اسلام آباد (نیشنل ٹائمز) وزیراعظم عمران خان نے جمعہ کو لودھراں۔ملتان شاہراہ کی اپ گریڈیشن و بحالی کے منصوبے کا سنگ بنیاد رکھ دیا۔ یہ منصوبہ کراچی، لاہور ، پشاور قومی شاہراہ این 5 کااہم سیکشن ہے۔ 62 کلومیٹر طویل شاہراہ کی بہتری پر 6 ارب 88 کروڑ 60 لاکھ روپے لاگت آئے گی اور این ایچ اے 2 سال میں اس کی تکمیل کرے گا۔ یہ منصوبہ جہاں مواصلات کے ضمن میں اہم سنگ میل کی حیثیت رکھتا ہےوہاں اس شاہراہ کی بہتری سے جنوبی پنجاب میں ترقی کا نیا باب روشن ہوگا۔ منصوبے کی تکمیل پر لودھراں-ملتان کے درمیان ٹریفک بغیر کسی رکاوٹ کے جاری رہے گی، معاشی اور معاشرتی سرگرمیوں کو فروغ حاصل ہوگا اور روزگار کے مواقع فراہم ہوں گے۔ یہ منصوبہ اس اعتبار سے بھی خصوصی اہمیت کا حامل ہے کہ جغرافیائی اعتبار سے یہ سڑک ملک کے تقریباً مرکز میں واقع ہے اور صوبہ بلوچستان کی طرف بھی رسائی فراہم کرتی ہے۔