اسلام آباد(نیشنل ٹائمز)الیکشن کمیشن نے ضمنی انتخابات کے دوران خدمات سرانجام دینے والے سکیورٹی حکام کو ہدایت کی ہے کہ وہ انتخابی عمل بالخصوص گنتی کے دوران غیر جانبدار رہیں،امن و امان برقرار رکھنے،تنازعات سے گریز،پولنگ عملہ کی معاونت،گرفتاریوں اور مداخلت سے گریز کریں۔

ہفتہ کو کمیشن کی جانب سے قانون نافذ کرنے والے اداروں کے لیے جاری ضابطہ اخلاق کے مطابق سیکیورٹی اہلکار بشمول مسلح افواج اپنی ذمہ داریاں قانون کے مطابق سرانجام دیں۔انتخابی عمل کے پرامن اور شفاف انعقاد کے لیے عملہ کی معاونت کریں۔انہیں جہاں ذمہ داریاں تفویض کی جائیں وہیں خدمات سرانجام دیں۔آفیسران ڈی آر اوز،آر اوز اور پریذائیڈنگ آفیسرز کو مکمل معاونت فراہم کریں۔

پولنگ ایجنٹس اور مبصرین کو یہ حق حاصل ہے کہ وہ فارم 45 حاصل کریں اس دوران سکیورٹی اہلکار پولنگ عملہ اور میٹریل کی حفاظت یقینی بنائیں۔میڈیا اور مبصرین جن کے پاس ایکریڈیشن کارڈ ہوں وہ پولنگ سٹیشنوں کے اندر داخل ہوسکتے ہیں۔

میڈیا پرسنز کیمروں کے ساتھ پولنگ اور گنتی کے عمل کی فوٹیج بناسکتے ہیں۔ سکیورٹی عملہ کسی ووٹر سے پرچی یا شناختی کارڈ چیک کرنے کا مجاز نہیں۔کسی اہل ووٹر کو روکا نہیں جانا چاہیے۔گنتی کے عمل میں ووٹروں،ان کے ایجنٹس یا مبصرین کی موجودگی پر اعتراض سے گریز کیاجائے۔