لاہور(نیشنل ٹائمز) لاہور ہائی کورٹ میں سپریم کورٹ بار ایسوسی ایشن کے فنڈز کے حصول کا معاملہ۔ عدالت نے درخواست پر وفاقی اور صوبائی حکومت کو نوٹس جاری کرتے ہوئے دس روز میں جواب طلب کر لیا۔لاہور ہائیکورٹ نے ریمارکس دیئے کہ آپ سپریم کورٹ بار ہیں، آپ سپریم کورٹ جائیں۔ آپ کا آفس اسلام آباد میں ہے درخواست قابل سماعت نہیں ہے۔ جبکہ درخواستگزار نے کہا کہ سپریم کورٹ بار کا آفس لاہور میں بھی ہے۔چیف جسٹس قاسم خان نے سیکرٹری احمد شہزار فاروق کی درخواست پر سماعت کی۔درخواست میں فیڈریشن آف پاکستان ،سیکرٹری قانون، سیکرٹری فنانس اور چیف سیکرٹری پنجاب کو فریق بنایا گیا ہے۔سپریم کورٹ بار ایسوسی ایشن کے ممبران کی تعداد 37 سو ہے۔ سپریم کورٹ بار وفاقی حکومت اور صوبائی حکومت کے فنڈز پر چلتی ہے۔وفاقی حکومت اور حکومت پنجاب نے دو سال کے لیے فنڈز جاری نہیں کیے۔ فنڈز کی عدم دستیابی کی بنا پر بار کے اخراجات پورے کرنا ممکن نہیں رہا۔درخواستگزار نے استدعا کی کہ عدالت سپریم کورٹ بار کو فنڈز کی ادائیگی کا حکم دے۔