استنبول(نیشنل ٹائمز)ترکیہ کے صدر رجب طیب اردوان کے دورہِ امریکا کی تاریخ کا اعلان ہو گیا۔

ترک میڈیا کے مطابق عہدیدار کا کہنا ہے کہ ایردوان کا دورہِ امریکا 9 مئی کو طے ہے۔ ایک ترک سیکورٹی اہلکار نے جمعہ کو اس بات کی تصدیق کی کہ صدر اردوان بائیڈن انتظامیہ کے دوران اپنی پہلی وائٹ ہاؤس میٹنگ کے لیے جارہے ہیں۔

عہدیدار نے یہ بھی کہا کہ ترکی کی قومی انٹیلی جنس آرگنائزیشن (ایم آئی ٹی) کے ڈائریکٹر ابراہیم کالن جمعہ کو امریکی ایوان نمائندگان کے ارکان سے ملاقات کریں گے تاکہ صدر اردوان کے دورے اور دیگر دو طرفہ امور پر تبادلہ خیال کیا جا سکے۔

توقع ہے کہ اردوان اور بائیڈن ان مسائل پر بات کریں گے جو حالیہ برسوں میں اسرائیل کی غزہ پر جنگ، دفاعی تعاون اور دہشت گردی کے خلاف جنگ سمیت دو تاریخی اتحادیوں کے درمیان تعلقات کو خراب کر چکے ہیں۔

انقرہ طویل عرصے سے فلسطینی اسرائیل تنازعہ پر امریکی موقف پر تنقید کرتا رہا ہے، خاص طور پر نیتن یاہو انتظامیہ کی واشنگٹن کی غیر مشروط حمایت جس پر اردوان نے غزہ میں جنگی جرائم کے ارتکاب کا الزام لگایا تھا۔