اسلام آباد(نیشنل ٹائمز ) وزیراعظم عمران خان کی دعوت پر تاجکستان کے صدر بدھ کو 2روزہ دورے پر پاکستان پہنچیں گے، دورے کے دوران متعدد معاہدوں پر دستخط کیے جائیں گے۔ تفصیلات کے مطابق ترجمان دفترخارجہ کی جانب سے بیان میں کہا گیا ہے کہ تاجکستان کے صدر (آج) بدھ کو 2روزہ دورے پر پاکستان پہنچیں گے، وزیراعظم کی دعوت پرتاجک صدر امام علی رحمان 2 اور 3جون کو دورہ کریں گے، ان کے ہمراہ ایک اعلی سطح کا وفد بھی آئے گا۔ ترجمان دفتر خارجہ کا کہنا تھا کہ وزیر اعظم عمران خان اور تاجک صدروفودکی سطح پربات چیت کریں گے ، جس میں تجارت، سرمایہ کاری، توانائی، دفاع، تعلیم،علاقائی رابطوں پر تبادلہ خیال ہوگا۔ ترجمان نے بتایا کہ دورے کے دوران متعدد معاہدوں پر دستخط کیے جائیں گے جبکہ تاجک صدر صدر مملکت ڈاکٹر عارف علوی سے بھی ملاقات کریں گے۔ان کا کہنا تھا کہ پاکستان،تاجکستان کے مشترکہ عقیدے، مشترکہ تاریخ پرقریبی برادرانہ تعلقات ہیں، وسط ایشیاسے قریبی تعلقات ،بہترتعاون کیلئے تاجکستان اہم ملک ہے، تاجکستان کے صدر 1994 سے اب تک 7بار پاکستان کا دورہ کر چکے ہیں۔