نیویارک(نیشنل ٹائمز)نیویارک میں، کشمیری رہنماؤں کے وفد کی، ڈاکٹر غلام نبی فائی،سیکرٹری جنرل ورلڈ کشمیر آگاہی فورم کی قیادت میں، وزیر خارجہ مخدوم شاہ محمود قریشی سے ملاقات ہوئی۔ اقوام متحدہ میں پاکستان کے مستقل مندوب منیر اکرم بھی اس موقع پر موجود تھے۔ مقبوضہ جموں و کشمیر میں جاری انسانی حقوق کی سنگین خلاف ورزیوں کے حوالے سے تبادلہ خیال ہوا۔وزیر خارجہ نے اس موقع پر واضح کیا کہ مسئلہ کشمیر ہماری خارجہ پالیسی کا اہم ستون ہے ۔عالمی برادری کو یہ سمجھنے کی ضرورت ہے کہ جب تک مسئلہ کشمیر کو اقوام متحدہ، سلامتی کونسل کی قراردادوں کے مطابق حل نہیں کیا جاتا۔ جنوبی ایشیا میں امن کا خواب شرمندہ ء تعبیر نہیں ہو سکتا ۔ہمیں مقبوضہ جموں و کشمیر میں جاری انسانی حقوق کی سنگین خلاف ورزیوں پر گہری تشویش ہے ۔ ہندوستان، ڈومیسائل قوانین میں تبدیلی کے ذریعے، مقبوضہ جموں و کشمیر میں آبادیاتی تناسب کو تبدیل کرنے کے درپے ہے۔نہتے کشمیریوں کی اخلاقی، سیاسی اور سفارتی معاونت جاری رکھنے کیلئے پر عزم ہیں ۔کشمیری رہنماؤں کے وفد نے مسئلہ کشمیر کو، عالمی سطح پر، موثر انداز میں اجاگر کرنے اور بہترین خارجہ پالیسی اپنانے پر وزیر خارجہ مخدوم شاہ محمود قریشی کو مبارکباد دی۔