اسلام آباد(نیشنل ٹائمز)وزیر خارجہ مخدوم شاہ محمود قریشی نےاقوام متحدہ جنرل اسمبلی کے ہنگامی اجلاس میں شرکت پر روانگی سے قبل میڈیا سے گفتگو کی۔وزیر خارجہ کا کہنا تھا کہ امید ہے کہ آج کا جنرل اسمبلی کا اجلاس اہم ہوگا۔ انہوں نے کہاکہ میری اطلاعات کے مطابق آج کے فلسطین کے موضوع پر ہونے والے اجلاس کے لئے 95کے قریب ممالک اور آرگنائزیشن اپنے خیالات کا اظہار کریں گے۔میرا خیال تھا کہ آج کا اجلاس تین گھنٹے کا ہوگا مگر یہ اجلاس طویل ہوگا۔اجلاس نیویارک کے وقت کے مطابق دس بجے شروع ہوگا اور رات تک چلے گا۔ابھی کچھ دیر بعد پاکستانی وقت کے مطابق رات آٹھ بجے میراجنرل اسمبلی میں خطاب ہے ۔میں جنرل اسمبلی میں پاکستان کا بھرپورنقطہ نظر پیش کروں گا۔فلسطین کے وزیرخارجہ نے بتایا کہ کل رات غزہ میں پچیس منٹ میں ایک سو پچیس، بم غزہ پر گرائے گئے۔اس سے آپ فلسطین میں ہونے والے مظالم کا اندازہ لگاسکتے ہیں ۔میرا فرض بنتا ہے کہ میں حقائق جنرل اسمبلی کے سامنے رکھوں۔او آئی سی کے ،تمام اہم ممالک متحرک ہیں۔ سعودی وزیرخارجہ کا شکر گزار ہوں کہ وہ خود آئے ہیں۔اس وقت جو نسل کشی ہورہی ہے،دنیا اس طرف توجہ کیوں نہیں دے رہی۔عمران خان کا جو وژن تھا کہ امہ کو متحد کیا جائے ہم اس میں کامیاب ہوگئے ہیں۔کل رات ہماری عشائیے پر نشست ہوئی۔پندرہ میں سے چودہ ممبران ایک نقطے پر متفق ہیں ۔ہم توقع رکھتے ہیں کہ پندرہ کے پندرہ ممبران ایک ہی نقطے پر متفق ہوں اور ایک متفقہ لائحہ عمل طے پا سکے۔