لاہور(نیشنل ٹائمز) پولیس نے برطانوی نژاد پاکستانی لڑکی مقتولہ ماہرہ کے مبینہ قاتل ظاہر جدون اور سعد امیر بٹ کو گرفتار کرلیا۔ تفصیلات کے مطابق گزشتہ روز لاہور کے علاقے ڈیفنس فیز فائیو میں قتل ہونے والی جواں سال برطانوی نژاد لڑکی کے مبینہ قاتلوں کو پولیس نے گرفتار کرلیا۔ پولیس حکام نے بتایا کہ مقتولہ ماہرہ کے چچا کے بیان پرچار ملزمان کے خلاف مقدمہ درج کر رکھا ہے، جن میں سے دو نامزد ملزمان اورلڑکی کے دوست ظاہر جدون اور سعد امیر بٹ کو گرفتار کرلیا ہے، جب کہ باقی ملزمان کی گرفتاری کے لیے چھاپے مارے جارہے ہیں۔ حکام کے مطابق 26 سالہ ماہرہ کے والدین بیرون ملک مقیم ہیں، ماہرہ چند روز قبل ہی اپنی دوست سجل کے ہمراہ برطانیہ سے پاکستان آئی تھی، اور فیز فائیو میں کرائے کے گھر میں اپنی دوست اقرا کے ہمراہ رہائش پزیر تھی، مقتولہ کو سحری کے وقت اس کے دوست گھر چھوڑ کر گئے اور دوپہر میں لاش برآمد ہوئی، ماہرہ ذوالفقارکے پوسٹ مارٹم کی ابتدائی رپورٹ بھی جاری کردی گئی جس کے مطابق ماہرہ کی گردن کے نزدیک گولی لگی ہے اور جسم پر بھی زخم کے نشان پائے گئے ہیں۔