اسلام آباد(نیشنل ٹائمز) پاکستان پیپلز پارٹی کے سیکرٹری جنرل سید نیر حسین بخاری نے عالمی یوم مزدور پر پیغام میں کہا ہے کہ حکمران شراکتی مالیاتی مافیاز کو ایمنسٹی سکیمیں دے رہے ہیں اور مزدوروں سے روزگار چھین رہے ہیں ۔انہوں نے کہا کہ صنعتی مزدوروں محنت کشوں کی بدحالی حد سے زیادہ بڑھ گئی ہے۔کسان کاشتکار ہاری کھیت مزدور زبوں حالی کا شکار ہے۔نیر بخاری نے مزید کہا کہ پاکستان پیپلزپارٹی مزدوروں کے حقوق کی خاطر مزدور کے شانہ بشانہ کھڑی ہے۔قائد عوام زوالفقار علی بھٹو حکومت میں پہلی مزدورپالیسی کا اجراء ہوا۔ انہوں نے کہا کہ زوالفقار علی بھٹو دور میں مزدور کے حقوق کے تحفظ کی خاطر مزدوروں کو یونین سازی کا حق ملا ۔بے نظیر بھٹو دور میں مزدوروں کی مہنگائی کے تناسب سے تنخواہ مقرر ہوئی۔ صدر آصف علی زرداری نے مزدوروں محنت کشوں کی فلاح و بہبود کیلئے عملی اقدامات اٹھائے ۔سرکاری ملازمین کی تنخواہوں اور پینشنون میں اضافہ کیا گیا ۔نیر بخاری نے مزید کہا کہ پیپلز پارٹی نے مزدوروں کو اداروں کا حصہ دار بنایا ۔مزدوروں کے لئے رہائشی کالونیوں ہسپتالوں اور انکے بچوں کو نوکریاں میں کوٹہ دیا گیا۔ نیر بخاری نے کہا کہ مزدور معاشی اقتصادی ترقی میں ریڑھ کی ہڈی کی حیثیت رکھتے ہیں۔ چیرمین بلاول بھٹو زرداری کی قیادت میں پی پی پی مزدوروں کے حقوق کے لئے جدوجہد جاری رکھے گی۔