وائٹ ہاؤس کا کہنا ہے کہ تیل پیداوار میں کمی کے فیصلے پر امریکی صدر بائیڈن کا ماننا ہے کہ امریکا کو سعودی عرب سے اپنے تعلقات پر نظر ثانی کرنی چاہیے۔ترجمان وائٹ ہاؤس جان کربی کے مطابق امریکی صدر کا کہنا ہے کہ اب وقت آگیا ہے کہ امریکا سعودی تعلقات امریکی قومی مفاد میں ہونے کو یقینی بنایا جائے۔جان کربی کا کہنا ہے کہ امریکی صدر بائیڈن امریکا سعودیہ تعلقات پر نظرثانی کرنا چاہتے ہیں، صدر بائیڈن کا ماننا ہے کہ تیل پیداوار میں کمی کے فیصلے کے بعد سعودی عرب سے تعلقات پر نظرثانی ہونی چاہیے۔تیل پیدا کرنے والے ممالک کی تنظیم اوپیک پلس نے عالمی معیشت اور تیل منڈی کی غیر یقینی صورتِ حال پر نومبر سے تیل پیداوار میں کمی کا فیصلہ کیا ہے۔ امریکا نے اوپیک پلس کے فیصلے کی مخالفت اور اس پر تنقید کرتے ہوئےکہا ہے کہ تیل پیداوار میں کمی سے روس کو فائدہ ہوگا۔