اسلام آباد(نیشنل ٹائمز)بالی ووڈ انڈسٹری کی اُبھرتی ہوئی اداکارہ سارہ علی خان نے مشہور پاکستانی ڈیزائنر محسن نوید رانجھا کے ڈیزائن کیے ہوئے جوڑے میں ایک برطانوی میگزین کے لیے فوٹو شوٹ کروایا ہے۔محسن نوید رانجھا نے فوٹو اینڈ ویڈیو شیئرنگ ایپ انسٹاگرام پر سارہ علی خان کی ایک خوبصورت تصویر شیئر کی ہے۔سارہ علی خان اس تصویر میں محسن نوید رانجھا کا ڈیزائن کیا ہوا برائیڈل ڈریس پہنے بہت دلکش نظرآرہی ہیں۔اُنہوں نے یہ تصویر شیئر کرتے ہوئے لکھا کہ ’بالی ووڈ کی نواب زادی نے ہمارا جوڑا پہن کر میگزین کے لیے فوٹو شوٹ کروایا ہے اور اپنی شاہانہ دلکشی سے مسرور کیا ہے‘۔خیال رہے کہ کچھ عرصہ پہلے سارہ علی خان کی محسن نوید رانجھا کے ساتھ لندن میں ہونے والی ملاقات کے دوران لی گئی تصاویر میڈیاکی توجہ کا مرکز بنی تھیں۔ان تصاویر میں محسن نوید رانجھا نیلے رنگ کی ٹی شرٹ اور جینز جبکہ سارہ علی خان سفید رنگ کے ٹینک ٹاپ اور گلابی رنگ کی ٹریک پینٹ پہنے نظر آرہی ہیں۔یہ تصاویر سامنے آتے ہی مداحوں نے دونوں معروف شخصیات کے درمیان مستقبل میں شراکت داری ہونے کے امکانات کے بارے میں سرگوشیاں کرنا شروع کردی تھیں۔