اسلام آباد(نیشنل ٹائمز) پولیس نے تحریک انصاف کے رہنما شہباز گل کے موبائل فون کی برآمدگی کیلئے ڈرائیور کے گھر پر چھاپہ مارا۔ جیو نیوز کے مطابق شہباز گل کا ڈرائیور اظہار فرار ہو گیا۔ پولیس کا کہنا ہے کہ چھاپے کے دوران ڈرائیور کی اہلیہ اور برادر نسبتی کو گرفتار کر لیا گیا۔ خاتون اور اسکے بھائی کیخلاف تھانہ آبپارہ میں کار سرکار میں مداخلت کا مقدمہ درج کر لیا گیا ہے۔مقدمے میں خاتون اور اسکے بھائی پر پولیس پر حملہ اور وردی پھاڑنے کا الزام عائد کیا گیا۔ مقدمے کے متن کے مطابق شہباز گل نے تفتیش کے دوران موبائل فون ڈرائیور کے پاس ہونے کا انکشاف کیا تھا۔ واضح رہے کہ دو روز قبل اسلام آباد پولیس نے متنازعہ بیان پر تحریک انصاف کے رہنما شہباز گل کو بھی گرفتار کیا تھا۔ادھر گزشتہ روز اسلام آباد کی مقامی عدالت نے غداری کے مقدمے میں گرفتار پی ٹی آئی رہنما شہباز گل کو 2 روزہ جسمانی ریمانڈ پر پولیس کے حوالے کیا۔شہباز گل کو اسلام آباد کچہری میں پیش کیا گیا جہاں ڈیوٹی مجسٹریٹ عمر شبیر نے کیس کی سماعت کی۔ اسلام آباد پولیس کی جانب سے عدالت سے شہباز گل کے جسمانی ریمانڈ کی استدعا کی گئی تھی۔ شہباز گل کے وکیل فیصل چوہدری نے عدالت میں جسمانی ریمانڈ کی استدعا کی مخالفت کی۔ پولیس نے عدالت سے استدعا کی کہ ملزم شہباز گل سے موبائل فون برآمد کرنا ہے۔ملزم جس پیپر کو دیکھ کر بول رہا تھا وہ بھی برآمد کرنا ہے،پروگرام کس کے کہنے پر ہوا اس بارے میں بھی تفتیش کرنی ہے لہٰذا ملزم کا جسمانی ریمانڈ دیا جائے۔ اسلام آباد کی عدالت نے غداری کے مقدمے میں گرفتار پی ٹی آئی رہنما شہباز گل کو 2 روزہ جسمانی ریمانڈ پر پولیس کے حوالے کیا۔ عدالت کی جانب سے کوہسار پولیس کو شہباز گل کو جمعہ کے روز دوبارہ پیش کرنے کا حکم دیا گیا ہے۔