اسلام آباد (نیشنل ٹائمز)سپریم کورٹ نے آرٹیکل 63 اے کی تشریح کے لیے دائر صدارتی ریفرنس پر نظر ثانی درخواست اعتراض لگا کر واپس بھیج دی۔سپریم کورٹ رجسٹرار آفس کی جانب سے صدارتی ریفرنس سے متعلق فیصلے کے خلاف نظرثانی درخواست پر اعتراض لگا کر واپس کر دی۔عدالت کی جانب سے لگائے گئے اعتراض میں کہا گیا ہے کہ آرٹیکل 63 اے کی تشریح کے دائر ریفرنس پر کیے گئے فیصلے پر نظرثانی کی درخواست قابل سماعت نہیں ہے، آرٹیکل 63 اے کی تشریخ کا ریفرنس صدر مملکت کی جانب سے بھیجا گیا تھا۔اعتراض میں کہا گیا ہے کہ صدارتی ریفرنس آرٹیکل 186 کے تحت سپریم کورٹ کو صدر کی جانب سے بھیجا جاتا ہے، کسی بھی آرٹیکل کی تشریح کا معاملہ سپریم کورٹ اور صدرکے درمیان ہوتا ہے جبکہ صدارتی ریفرنس میں دیے گئے فیصلے پر نظرثانی درخواست قابل پذیرائی نہیں۔یاد رہے کہ آرٹیکل 63 اے کے عدالتی فیصلے پر نظرثانی کی درخواست پاکستان تحریک انصاف کی منحرف رکن عائشہ نواز نے دائر کی تھی۔