فرانسیسی حکومت نے توانائی کی بچت کے لیے نئے قوانین نافذ کردیے۔غیر ملکی میڈیا کے مطابق فرانسیسی حکومت نے توانائی کی بچت کے لیے اہم فیصلے کیے ہیں جس کے تحت ائیرکنڈیشن استعمال کرنے والی دکانوں کو ائیرکنڈیشن کے استعمال کے وقت دکان کے دروازے بند رکھنے کا حکم دیا گیا ہے۔میڈیا رپورٹس کے مطابق فرانس کے بعض علاقوں میں یہ قوانین پہلے سے نافذ تھے تاہم اب وزیر توانائی نے ملک بھر میں یہ قوانین نافذ کرنے کا اعلان کیا ہے۔یوکرین اور روس کے درمیان جاری تنازع کے بعد سے یورپ میں انرجی کی قیمتوں میں اضافہ ہوا ہے۔میڈیا رپورٹس کے مطابق ائیرکنڈیشن سے متعلق قوانین کی خلاف ورزی کرنے والی دکانوں پر 750 یورو جرمانہ عائد کیا جائے گا۔وزیر توانائی کا کہنا تھا کہ ائیرکنڈیشن کے استعمال کے دوران آمدورفت کے دروازے کھلے رکھنا مضحکہ خیز ہے۔وزیر توانائی نے کہا کہ وہ توانائی کے ضیاع سے متعلق آئندہ دنوں میں مزید احکامات جاری کریں گی تاہم ابتدائی طور پر ائیرکنڈیشن کو لے کر قوانین نافذ کیے گئے ہیں جب کہ شہر میں لگے برقی اشتہارات کے بورڈز کو پر خاص اوقات میں پابندی عائد کی گئی ہے جس دوران ہر قسم کے اور ہر سائز کے اشتہارات کی لائٹیں بند رہیں گی۔میڈیا رپورٹس میں بتایا گیا ہےکہ فرانس میں شدید گرمی کے باعث پہلے ہی ائیرکنڈیشن کے استعمال میں اضافہ ہوگیا ہے جس کےتحت حکومت سخت فیصلے کررہی ہے۔