پاکستان پیپلز پارٹی (پی پی پی) کی رہنما اور وفاقی وزیر برائے موسمیاتی تبدیلی شیری رحمان کا کہنا ہے کہ جب کسی سیاسی لیڈر کا خط آجائے تو کوئی ابہام نہیں رہتا، پارٹی صدر پارلیمانی لیڈر کو نامزد کرتا ہے، یہ انڈے سے نہیں نکلتے۔لاہور میں میڈیا سے گفتگو کرتے ہوئے شیری رحمان نے کہا کہ جب تضاد ہو تو فوقیت پارلیمانی پارٹی کو نہیں، پارٹی سربراہ کو ہوگی، پارٹی سربراہ کی ہدایت فوقیت رکھتی ہے۔وفاقی وزیر نے کہا کہ پیپلز پارٹی کی پٹیشن 11 بجے واپس کردی گئی، ہم وہاں کھڑے رہے، برائے مہربانی آپ ساری پارٹی کو سن تو لیں۔شیری رحمان نے کہا کہ عدالتوں کا ہمیشہ احترام کرتے رہے ہیں، پیپلز پارٹی نے درخواست جمع کروائی نہ ہمیں سنا گیا نہ جے یو آئی کو۔انہوں نے کہا کہ سیاسی بحران تحریک انصاف پیدا کر رہی ہے، ملک میں اس وقت گو مگوں کی کیفیت ہے، امید ہے اب عدالت فل بینچ تشکیل دے گی، ہم عدلیہ کی عزت کرتے ہیں۔