برلن(نیشنل ٹائمز)وزیر خارجہ مخدوم شاہ محمود قریشی دو روزہ دورہ ء جرمنی مکمل کرنے کے بعد وفد کے ہمراہ واپس وطن روانہ ہو گئے ۔برلن ہوائی اڈے پر جرمن وزارت خارجہ کےسینئر حکام اور جرمنی میں تعینات پاکستانی سفیر ڈاکٹر محمد فیصل نے وزیر خارجہ کو الوداع کہا۔وزیر خارجہ، اپنے جرمن ہم منصب ہائیکو ماس کی دعوت پر برلن تشریف لائے تھے اوروزیر خارجہ نے اپنے دو روزہ دورے کے دوران ، جرمن وزیر خارجہ ہائیکو ماس، جرمنی کی پارلیمنٹ کے صدر وولف گانگ شوئبلے سمیت اہم قیادت سے ملاقاتیں کیں ۔ان ملاقاتوں میں دو طرفہ تعلقات، مختلف اقتصادی و تجارتی شعبہ جات، ،سرمایہ کاری، سائینس اینڈ ٹیکنالوجی، متبادل توانائی، تعلیم میں دو طرفہ تعاون کے فروغ سمیت اہم علاقائی و عالمی امور پر تبادلہ خیال کیا گیا۔وزیر خارجہ نے جرمن قیادت کو افعان امن عمل، مقبوضہ جموں و کشمیر میں انسانی حقوق کی مسلسل پامالیوں ،سمیت مجموعی علاقائی صورتحال سے بھی آگاہ کیا۔ وزیر خارجہ نے پاکستان کیلئے جی ایس پی پلس سٹیٹس اور ایف اے ٹی ایف سمیت مختلف معاملات میں جرمنی کی بھرپور حمایت پر جرمن قیادت کا شکریہ ادا کیا۔وزیر خارجہ نے معروف جرمن کمپنی “سیمنز”(Siemens ) کے چیف ایگزیکٹو آفیسر “جو کیسر” سمیت جرمنی کی اہم کاروباری شخصیات سے ملاقاتیں کیں اور انہیں حکومت کی جانب سے دی جانے والی کاروباری سہولیات سے آگاہ کرتے ہوئے انہیں پاکستان میں سرمایہ کاری کی دعوت دی، جو انہوں نے خوش دلی سے قبول کی۔وزیر خارجہ کا یہ دورہ ء جرمنی، ایسے تاریخی وقت پر ہوا جب پاکستان اور جرمنی اپنے ، دو طرفہ سفارتی تعلقات کے ستر سال مکمل کر رہے تھے ۔وزیرخارجہ نے جرمنی میں مقامی و بین الاقوامی میڈیا نمائندگان سے گفتگو کی اور مختلف علاقائی و عالمی امور کے حوالے سے پاکستان کے نکتہ نظر کی وضاحت کی۔وزیر خارجہ نے برلن میں واقع پاکستانی سفارت خانے کا دورہ کیا اور وہاں تعینات پاکستانی سفارتی عملے سے ملاقات کی، معاشی سفارت کاری کے حوالے سے کاوشوں میں تیزی لانے کی ہدایت کی اور بہترین کارکردگی پر انہیں سراہا ۔