اسلام آباد (نیشنل ٹائمز)کویت نے پیغمبر اسلام ﷺ کے بارے میں بھارتیہ جنتا پارٹی(بی جے پی) کی رہنما کے گستاخانہ بیان پر احتجاج کرنے والے تارکینِ وطن کو ملک بدر کرنے کا فیصلہ کرلیاہے۔خبر رساں ادارے کی ایک رپورٹ کے مطابق، کویت کی جانب سے یہ فیصلہ کیا گیا ہے کہ تمام تارکینِ وطن، جنہوں نے بی جے پی کی معطل ترجمان نوپور شرما کے پیغمبر محمدﷺ کے بارے میں کیے گئے گستاخانہ تبصرے کے خلاف احتجاج میں حصّہ لیا تھا، اُنہیں ملک بدر کردیا جائے گا۔رپورٹ میں یہ بھی بتایا گیا ہے کہ یہ فیصلہ لینے کی وجہ کویت کے قوانین ہیں جن کے مطابق، کسی بھی تارکینِ وطن کے دھرنے یا مظاہروں کا حصّہ بننے پر پابندی ہے۔کویتی حکّام کی جانب سے جاری کردہ ہدایات میں کہا گیا ہے کہ کویت میں رہنے والے تمام تارکینِ وطن کو کویت کے قوانین کا احترام کرنا چاہیے اور کسی بھی قسم کے مظاہروں میں حصہ نہیں لینا چاہیے۔رپورٹ کے مطابق، کویتی حکّام نے اس سلسلے میں احتجاج میں حصّہ لینے والے تارکینِ وطن کو گرفتار کرنے اور انہیں ان کے ممالک میں ڈی پورٹ کرنے کے عمل کا آغاز کردیا ہے۔حکّام کا یہ بھی کہنا ہے کہ ملک بدر کیے جانے والے تارکینِ وطن کے کویت میں دوبارہ داخلے پر بھی پابندی عائد کر دی جائے گی۔خیال رہے کہ بی جے پی کی معطل رہنما نوپور شرما کے پیغمبرِ اسلام ﷺ کے بارے میں گستاخانہ بیان پرتمام خلیجی ممالک میں بڑے پیمانے پر احتجاجی مظاہرے کیے گئے ہیں۔عرب ممالک نے خطے میں موجود بھارتی سفیروں کو طلب کرکے بھی اس معاملے پر سخت احتجاج ریکارڈ کروایا ہے۔