جہلم (نیشنل ٹائمز) وائس چیئرمین پی ٹی آئی شاہ محمود قریشی نے کہا ہے کہ شہبازشریف نے کل خود تسلیم کرلیا کہ مراسلہ موجود ہے، مراسلہ سچ ہونے پر شہبازشریف کو آج عمران خان کے قدموں میں ہونا چاہیے، امپورٹڈ وزیراعظم اب بتائیں کہ مراسلہ سچ ہے یا جھوٹ؟ انہوں نے جہلم میں عوامی جلسے سے خطاب کرتے ہوئے کہا کہ شہبازشریف نے کل خود تسلیم کیا کہ مراسلہ موجود ہے، شہبازشریف نے کہا کہ اگر مراسلہ درست ثابت ہوا تو عمران خان کے ساتھ کھڑاہوں گا، جہلم کے لوگ بتاو مراسلہ سچا ہے یا جھوٹا؟ امپورٹڈ وزیراعظم کہتے ہیں مراسلہ جھوٹ اور فرضی تھا، شہبازشریف کو آج عمران خان کے قدموں میں ہونا چاہیے، کیا تحریک عدم اعتماد دھمکی کا نتیجہ ہے؟ بلاول سندھ میں پانی بحران پر کیوں خاموش ہیں؟ اعداد وشمار کے مطابق پاکستان میں گندم اور آٹے کا بحران آنےوالا ہے۔

پاکستان تحریک انصاف کے ترجمان فواد چودھری نے جہلم میں عوامی جلسے سے خطاب کرتے ہوئے کہا کہ اس سال 126لوگ جو پاکستان کی سرحدوں پر شہید ہوئے اس میں درجن سے زیادہ لوگ جہلم کے تھے، ہر شہر کے لوگ اپنے طریقے سے پاکستان کی خدمت کرتے ہیں، لیکن یہ وہ دھرتی ہے جس کے لوگ پاکستان کی بنیادوں کو اپنا لہو دیتے ہیں تاکہ پاکستان کھڑا رہے، آپ نے ہمیں موٹروے دی، جی ٹی روڈ دی، پیاسی دھرتی کو نہر کا تحفہ دیا، جہلم کے لوگ اس لیے نہیں کھڑے کہ آپ ترقیاتی کاموں کی وجہ سے ہمارے محسن ہیں، بلکہ لوگ اس لیے ساتھ ہیں کہ آپ حرمت رسولﷺ اور پاکستان کی خودمختاری کیلئے کھڑے ہیں، پاکستان میں حکومت کا فیصلہ امریکا نے نہیں بلکہ جہلم اور چترال پاکستان کے لوگوں نے کرنا ہے۔
پاکستان ہمارا گھر ہے اس گھر پر ڈاکوؤں نے حملہ کردیا ہے، جب ڈاکو حملہ کردیں تو چوکیدار یہ نہیں کہہ سکتا کہ میں نیوٹرل ہوں، جہلم مطالبہ کرتا ہے ملک کے بحران کا واحد حل الیکشن ہے، اگر الیکشن نہ ہوا تو معاملے کا حل پیچیدہ ہوگا۔ عوام کے سوموٹو لینے سے پہلے وہ سوموٹو لیں جن کا آئین کے تحت فرض ہے، اسلام آبا دکے تخت کا فیصلہ عوام کریں گے ، کسی امپورٹڈ حکومت اور چیری بلاسم کو نہیں مانتے،آج ایک نیا تماشہ ہوا ہے کہ ایک مجرم لندن میں کرائم منسٹر اور اس کی کابینہ کو لندن طلب کررہا ہے، کہتا ہے ہمیں این آراو ٹو بنا کردکھاؤ،پاکستان کا فیصلہ عوام کریں گے کوئی چیری بلاسم یا زرداری جیسی بیماری نہیں کرے گی۔ یہ تو ابتدا ہے اگر اسلام آباد تو ایوان لرز جائیں گے۔