اسلام آباد (نیشنل ٹائمز) وزیر اعظم شہباز شریف نے ابو ظہبی کے ولی عہد کو ٹیلیفون کیا اور معاشی وفد بھیجنےپر ان کا شکریہ ادا کیا،وزیراعظم نے ولی عہد کو اولین فرصت میں پاکستان کا دورہ کرنے کی دعوت دی۔
نجی ٹی وی ہم نیوز کے مطابق وزیر اعظم شہباز شریف نے ابو ظہبی کے ولی عہد محمد بن زائد النہیان سے ٹیلیفونک رابطہ کیا ، وزیر اعظم نے شہزاد ہ محمد اور متحدہ عرب امارات کے عوام کو عید کی مبارکباد دی ، وزیر اعظم نے امارتی عوام کے امن و خوش حالی کے لیے نیک تمناؤں کا اظہار کیا اور دورہ یو اے ای کے دوران پرتپاک استقبال اور میزبانی پر ولی عہد کا شکریہ ادا کیا۔
دوران گفتگو دونوں برادر ممالک کے درمیان طویل المدتی تعلقات کو مزید مضبوط بنانے کے عزم کا اعادہ کیا گیا ، وزیر اعظم پاکستان نے کہا کہ پاکستان یو اے ای کے ساتھ تجارت،سرمایہ کاری و دیگر امور پر تعاون کا خواہاں ہے۔اس موقع پر ابو ظہبی کے ولی عہد نے وزیراعظم کو عید کی مبارکباد اورخیرسگالی کے جذبات کا اظہار کیا۔
