لاہور(نیشنل ٹائمز )گورنرپنجاب عمرسرفراز چیمہ کی جانب سے عثمان بزدار کو بطوروزیر اعلیٰ پنجاب بحال کیے جانے کے بعد بزدار کابینہ کا اجلاس ہوا جس کا اعلامیہ جاری کیا گیا ہے۔ اعلامیے میں کہا گیا ہے کہ پنجاب کابینہ کا آج کا اجلاس گورنر کے احکامات کے تحت ہوا جس میں کابینہ نے گورنر ہاوس میں پید اشدہ صورتحال پر تشویش کا اظہار کرتے ہوئے کہا کہ گورنرپنجاب کے آئینی احکامات کی موجودگی میں حمزہ شہباز کا حلف مزیدآئینی بحران پیدا کرےگا۔
رپورٹ کے مطابق اعلامیے میں کہا گیا ہے کہ پی ٹی آئی کے ایم پی ایز کی طرف سے ہائیکورٹ میں انٹرا کورٹ اپیل ابھی زیرسماعت ہے،بحران سے بچنے کے لیے ہمیں عدالتی احکامات کا انتظار کرنا چاہیے، انتظامیہ فریق نہ بنے، پولیس کے ذریعے گورنرہاو¿س پرچڑھائی، قبضہ اورفسطائیت نہ کرے۔اجلاس کی آئینی اورقانونی حیثیت مسلمہ ہے،کابینہ نے حمزہ شہباز کے الیکشن کو متنازع اور غیر قانونی و غیرآئینی قرار دیا ہے، گورنر پنجاب کے احکامات کی تشریح کے لیے عدالت عالیہ ہی مناسب فورم ہے،عدالت سے تشریح کے لیے رجوع کیا جارہا ہے۔
