اسلام آباد(نیشنل ٹائمز)اداکار وِل اسمتھ کے کِرس راک کو آسکر تقریب کے دوران مُکا مارنے کے معاملے پر والدہ کا ردعمل سامنے آگیا۔94 ویں اکیڈمی ایوارڈز کی تقریب میں پیش آئے واقعے پر ول اسمتھ کی والدہ کیرولین اسمتھ نے انکشاف کیا کہ ول اسمتھ بہت ہی سیدھا اور خوش مزاج انسان ہے، یہ پہلی بار ہے کہ میں نے اسے اس حالت میں دیکھا، اس کی زندگی میں پہلی بار ہی یہ موقع ہوا ہوگا کہ اس نے کسی کو یوں سر عام مُکا مارا ہو۔ انہوں نے ول اسمتھ کے ایوارڈ جیتنے پر کہا کہ میں جانتی ہوں کہ وہ کیسے کام کرتا ہے، وہ کتنی محنت کرتا ہے، میں شدید انتظار کر رہی تھی لیکن جب ایوارڈز میں نے ول اسمتھ کا نام سُنا تو میں حیران تھی۔آسکر ایوارڈ کے سلسلے میں جاری لائیو شو کے دوران کامیڈین کرس راک کی جانب سے میزبانی اور شرکاء کو ہنسانے کا سیشن جاری تھا، اس دوران کرس راک نے شرکاء کو ہنسانے کی غرض سے بہترین اداکار نامزد ہونے والے اداکار ول اسمتھ کی اہلیہ، اداکارہ جاڈا پنکیٹ اسمتھ کو مذاق کا نشانہ بنایا۔کرس راک کا جاڈا پنکٹ کے بالوں کی کٹنگ کا مذاق اور ایک فلم کے سیکوئل میں کام کرنے سے متعلق تجویز دی گئی، اس مذاق پر آسکر ایوارڈ کے ہال میں ایک دم خاموشی چھا گئی اور سب ہی اس مذاق پر حیران ہو گئے۔اپنی اہلیہ کا نام آنے پر ول اسمتھ اپنے جذبات پر قابو نہ رکھ سکے اور سیخ پا ہو گئے۔ول اسمتھ اپنی کرسی سے اُٹھ کر اسٹیج پر جا پہنچے اور کرس راک کو مکا دے مارا، اسٹیج سے واپس آتے ہوئے ول اسمتھ کا کرس راک پر چلّاتے ہوئے کہنا تھا کہ ’میری بیوی کا نام اپنے منہ پر مت لاؤ۔‘اداکار نے کامیڈین کیلئے انسٹاگرام پر ایک معذرتی پیغام جاری کیا، ’کنگ رچرڈ‘ اسٹار وِل اسمتھ نے کہا کہ ’میں آپ سے عوامی طور پر معافی مانگتا ہوں کرس، میں غلط تھا اور اب میں اپنے کیے پر شرمندہ ہوں اور میری حرکت ایک ایسے شخص کی طرح نہیں تھی جیسا بننے کی میں کوشش کرتا ہوں۔‘ول اسمتھ کا کہنا تھا کہ ’تشدد کسی بھی صورت میں ہو وہ زہریلا اور تباہ کن ہے، کل رات کے اکیڈمی ایوارڈز میں میرا رویہ ناقابل قبول اور ناقابل معافی ہے۔‘انہوں نے لکھا کہ مجھے معلوم ہے کہ مذاق کرنا آپ کا کام ہے لیکن جاڈا کی طبی حالت کے بارے میں ایک لطیفہ میرے لیے ناقابلِ برداشت تھا اور میں نے جذباتی طور پر ردعمل ظاہر کیا۔واضح رہے کہ ول اسمتھ کی اہلیہ، اداکارہ جاڈا پنکیٹ اسمتھ بالوں کی بیماری ’ایلو پیشیا‘ کا شکار ہیں جس کی تشخیص کا انہوں نے 2018 میں عوام کے سامنے انکشاف کیا تھا۔