اسلام آباد(نیشنل ٹائمز)اپوزیشن جماعتوں نے تحریک عدم اعتماد پر غور کیلئے مشترکہ مشاورتی اجلاس طلب کرلیا۔ذرائع کے مطابق پیرکو تمام اپوزیشن جماعتوں کا مشترکہ اجلاس ہوگا اور یہ اجلاس اسلام آباد میں اپوزیشن لیڈر شہباز شریف کی رہائش گاہ پر ہوگا۔ذرائع کا کہنا ہے کہ شہباز شریف کی جانب سے اپوزیشن رہنماؤں کے اعزاز میں عشائیہ بھی دیا جائے گا۔ذرائع نے بتایا کہ اجلاس میں مولانا فضل الرحمان اور بلاول بھٹو زرداری بھی شریک ہونگے جبکہ آصف علی زرداری کو بھی دعوت دی گئی ہے۔ذرائع کا کہنا ہے کہ اختر مینگل سمیت اپوزیشن کی تمام جماعتوں کے قائدین کو مدعو کیا گیا ہے۔اجلاس میں تحریک عدم اعتماد پرحکمت عملی، حکومتی اتحادی جماعتوں سے رابطوں، پارلیمنٹ لاجز میں ایم این ایز پر تشدد اورگرفتاری کے بعد کی صورتحال پر مشاورت ہوگی۔