لاہور (مانیٹرنگ ڈیسک ) مسلم لیگ ن کے رہنما حمزہ شہباز نے وزیر اعظم پر تنقید کرتے ہوئے کہا کہ عمران خان نوٹس لینا چھوڑ دیں ، ان کے نوٹس کے بعد ہر چیز کی قیمت بڑھ کر دگنی ہو جاتی ہے ۔احتساب عدالت میں پیشی کے موقع پر میڈیا سے گفتگو کرتے ہوئے اپوزیشن لیڈر پنجاب اسمبلی حمزہ شہباز کا کہنا تھا کہ مہنگائی سے لوگ پریشان ہوگئے ہیں،عمران خان مہنگائی پر خطے کی مثالیں دے رہے ہیں ، عمران خان ہر خطاب میں عوام سے غلط بیانی کرتے ہیں ،انا کے پہاڑ سے اتر کر عوام کا درد محسوس کریں۔حمزہ شہباز نے مزید کہا کہ آج ڈالر کہاں پر ہے،چینی کی قیمت قابو سے باہر ہوگئی ہے ،خطے میں سب سےزیادہ مہنگائی پاکستان میں ہے۔اس سے قبل حمزہ شہباز ، شہباز شریف کے ہمراہ منی لانڈرنگ سے متعلق کیس میں احتساب عدالت میں پیش ہوئے جہاں عدالت نے کیس کی سماعت 12 نومبر تک ملتوی کر دی ۔