یانگون (شِنہوا) یانگون میں چینی ثقافتی مرکز کے ڈائریکٹر ہان جیاجون نے کہا ہے کہ میانمار کے 134 سیاحوں اور کاروباری مقاصد کے لئے سفر کرنے والے 98 افراد نے میانمار ایئر ویز انٹرنیشنل کی یانگون سے چھنگ دو کے لئے پہلی پرواز میں سفر کیا۔ اس طرح میانمار کے شہر یانگون اور چین کے جنوب مغربی صوبے سیچھوان کے شہر چھنگ دو کے درمیان براہ راست فضائی رابطہ قائم ہو گیا ہے ۔
انہوں نے شِنہوا کو بتایا کہ اس نئے فضائی روٹ سے دونوں مقامات کے درمیان فضائی رابطے میں بہتری آئی ہے، سفر کا وقت اور اخراجات کم ہوئے ہیں جبکہ سیاحت، تجارت، سرمایہ کاری اور کاروباری تعاون کے شعبوں میں سرحد پار روابط کو آسان بنایا گیا ہے۔
انہوں نے مزید کہا کہ چین-میانمار اقتصادی راہداری جیسے اقدامات سے حاصل ہونے والے فوائد کے ساتھ یہ نیا فضائی روٹ دونوں خطوں کے درمیان ثقافت، سیاحت، تجارت، صنعتی سرمایہ کاری، کاروباری اداروں کے درمیان تعاون اور عوامی روابط کو فروغ دینے میں مددگار ثابت ہوگا۔
ان کے مطابق اس فضائی رابطے سے چھنگ دو میں قائم کاروباری اداروں کو میانمار کی منڈی میں اپنے کاروبار کو وسعت دینے اور صوبہ سیچھوان اور میانمار کے درمیان اقتصادی و تجارتی تعاون مزید مضبوط بنانے میں بھی مدد ملے گی۔
انہوں نے بتایا کہ اس روٹ پر ایک ہفتے میں تین پروازیں چلانے کا منصوبہ ہے تاہم فی الحال ہر دو ہفتوں میں تین پروازیں چلائی جا رہی ہیں۔