لانژو (شِنہوا) چین کے شمال مغربی صوبے گانسو میں منعقدہ پہلے چین-دون ہوانگ بین الاقوامی ووشو مقابلے میں پی گوا چھوان کے مقابلے میں تیسری پوزیشن حاصل کرنے کے بعد 24 سالہ الطیب عبداللہ نے سٹیج پر کھڑے ہو کر تماشائیوں کی جانب ہاتھ ہلایا۔ یہ مقابلے منگل کو منعقد ہوئے تھے۔
سوڈان سے تعلق رکھنے والے عبداللہ لانژو جیاؤتونگ یونیورسٹی میں الیکٹریکل انجینئرنگ اور آٹومیشن کے طالب علم ہیں۔ ان کے لئے ووشو چینی ثقافت کو قریب سے جاننے اور مختلف پس منظر رکھنے والے لوگوں سے رابطے کا ذریعہ بن گیا ہے۔
چین-دون ہوانگ کے پہلے بین الاقوامی ووشو مقابلے جمعرات کو اختتام پذیر ہوئے۔ ان میں 20 سے زائد ممالک اور خطوں کی 140 سے زیادہ ٹیموں کے تقریباً 2 ہزار کھلاڑیوں نے حصہ لیا۔
عبداللہ نے لانژو کی یونیورسٹی میں داخلہ لینے کے بعد مارشل آرٹس سیکھنا شروع کیا۔
انہوں نے کہا کہ یہ میرے لئے ایک نیا تجربہ تھا اور مجھے خوشی ہوئی کہ مجھے اس میں حصہ لینے اور کچھ نیا سیکھنے کا موقع ملا۔ انہوں نے مزید کہا کہ اس اعزاز سے انہیں مارشل آرٹس کی مہارتیں مزید بہتر بنانے کی ترغیب ملے گی۔
صحراۓ گوبی کے کنارے واقع دون ہوانگ ایک قدیم نخلستانی شہر ہے جو کبھی شاہراہ ریشم کے اہم سنگم پر واقع تھا۔ یہاں موجود موگاؤ غار، جو یونیسکو کے عالمی ثقافتی ورثے میں شامل ہیں، بدھ مت سے متعلق چٹانوں پر قدیم نقش و نگار اور مجسموں کا خزانہ ہیں، جن کی تاریخ چوتھی صدی عیسوی تک جاتی ہے۔
عبداللہ نے کہا کہ میں نے اس قدیم شہر میں مارشل آرٹس کے ذریعے نظم و ضبط، صبر اور محنت کی اہمیت سیکھی ہے۔ انہوں نے بتایا کہ اس مقابلے نے انہیں نئے دوست بنانے اور چینی ثقافت کے بارے میں مزید جاننے کا موقع بھی فراہم کیا۔
چین کے 15 ویں پانچ سالہ منصوبے (2026-2030)میں اعلیٰ سطح پر وسعت کو مزید فروغ دینے پر زور دیا گیا ہے۔ اس تناظر میں دون ہوانگ سمیت حہ شی راہداری کے ساتھ واقع شہروں نے عوامی روابط، تجارت اور اقتصادی تعاون کے ذریعے بین الاقوامی تعلقات مضبوط بنانے کی کوششیں کی ہیں۔
ویتنام سے تعلق رکھنے والے 15 سالہ ہوانگ من نے بتایا کہ وہ تقریباً 9 سال سے مارشل آرٹس کی تربیت حاصل کر رہاہے اور دون ہوانگ میں یہ ان کا پہلا بین الاقوامی مقابلہ ہے۔
انہوں نے کہا کہ میں اس بین الاقوامی مارشل آرٹس مقابلے کے دوران اس قدیم شہر میں قیام سے لطف اندوز ہو رہا ہوں اور مارشل آرٹس اور چینی ثقافت کے بارے میں مزید سیکھ رہا ہوں۔
چین کی جنرل ایڈمنسٹریشن آف اسپورٹس کے مارشل آرٹس اسپورٹس مینجمنٹ سنٹر کے نائب ڈائریکٹر شین ژینگ گانگ نے کہا کہ دون ہوانگ میں منعقدہ اس تقریب نے مارشل آرٹس کو شاہراہ ریشم کی ثقافت کے ساتھ جوڑنے کے علاوہ بین الاقوامی تبادلے کے لئے ایک پلیٹ فارم بھی فراہم کیا۔
منتظمین کے مطابق اس مقابلے کا مقصد دون ہوانگ کے ثقافتی ورثے اور جغرافیائی اہمیت سے فائدہ اٹھاتے ہوئے مارشل آرٹس کے مقابلوں اور بین الاقوامی تبادلوں کو فروغ دینا تھا۔
عبداللہ نے کہا کہ میرے لئے مارشل آرٹس کے اس مقابلے میں شرکت کا تجربہ صرف انعام جیتنے تک محدود نہیں تھا بلکہ یہ خود کو آزمانے اور اچھی یادیں سمیٹنے کا موقع بھی تھا۔