بیجنگ (شِنہوا) ایک چینی فوجی ترجمان نے جمعہ کے روز یونٹ 731 کے بارے میں بننے والی ایک دستاویزی فلم کے جواب میں کہا ہے کہ جاپان دوسری جنگ عظیم کے دوران چین میں اپنی قابض فوج کے ہاتھوں ہونے والے جنگی جرائم کے مسلمہ حقائق سے انکار نہیں کر سکتا۔
چین کی وزارت دفاع کے ترجمان چھن شی نے یہ بات سنگاپور کے ٹی وی نیٹ ورک سی این اے کی جاپان کے جنگی حیاتیاتی ہتھیاروں کے پروگرام کے بارے میں تیار کردہ دستاویزی فلم ’’انسائیڈ یونٹ 731: جاپانی سیکرٹ ہیومن ایکسپریمنٹس‘‘ سے متعلق ایک پریس کانفرنس کے دوران پوچھے گئے سوال کے جواب میں کہی۔
چھن نے اس بات پر زور دیا کہ دوسری جنگ عظیم کے دوران یونٹ 731 نے زندہ انسانوں پر غیر انسانی تجربات کئے اور حیاتیاتی جنگ چھیڑی جس نے انسانی تہذیب کی تاریخ کا ایک سیاہ ترین باب رقم کیا۔
انہوں نے کہا کہ جاپان میں دائیں بازو کی قوتوں کی جانب سے جاپان کی جارحانہ جنگ کے جرائم کم کرنے اور تاریخ کے بارے میں عوامی شعور مسخ کرنے کی حالیہ کوششوں نے بین الاقوامی سطح پر تشویش پیدا کر دی ہے۔
چھن نے کہا کہ ماضی کے جرائم پر مکمل غور و فکر اور سچے دل کے ساتھ ندامت کے ذریعے ہی جاپان حقیقت میں آگے بڑھ سکتا ہے۔