بیجنگ (شِنہوا) چین کے نائب وزیراعظم حہ لی فینگ نے بیجنگ میں امریکہ-چین تعلقات سے متعلق قومی کمیٹی (این سی یو ایس سی آر) کے ایگزیکٹو وائس چیئرمین ایون گرین برگ سے ملاقات کی۔
حہ لی فینگ، جو کمیونسٹ پارٹی آف چائنہ (سی پی سی) کی مرکزی کمیٹی کے سیاسی بیورو کے رکن بھی ہیں، نے کہا کہ چینی صدر شی جن پھنگ نے حال ہی میں امریکہ کا سرکاری دورہ کیا جس کے دوران دونوں ممالک کے سربراہان مملکت نے باہمی احترام، انصاف اور باہمی مفاد پر مبنی تزویراتی استحکام کے حامل تعمیری چین-امریکہ تعلقات استوار کرنے پر اتفاق کیا۔
حہ لی فینگ نے کہا کہ چین اور امریکہ کو دونوں سربراہان مملکت کے درمیان طے پانے والے اہم اتفاق رائے پر مشترکہ طور پر عملدرآمد کرنا چاہیے تاکہ چین-امریکہ اقتصادی و تجارتی تعاون اور عالمی معیشت میں مزید اعتماد اور استحکام پیدا کیا جا سکے۔
حہ لی فینگ نے مزید کہا کہ امید ہے کہ امریکہ-چین تعلقات سے متعلق قومی کمیٹی چین اور امریکہ کے درمیان اقتصادی تعاون کے فروغ میں اپنا فعال کردار جاری رکھے گی۔
امریکی فریق نے اس بات پر زور دیا کہ چین اور امریکہ کے تعلقات کی مستحکم ترقی انتہائی اہمیت کی حامل ہے۔ اس نے دونوں ممالک کے درمیان اقتصادی روابط اور تعاون کو مزید فروغ دینے کے لئے رابطہ کار کا کردار جاری رکھنے پر آمادگی کا اظہار کیا۔