راولپنڈی(نیشنل ٹائمز)پاک فوج کے شعبہ تعلقات عامہ کے مطابق کوئٹہ میں مشاق تربیتی طیارے کے حادثے میں شہید ہونے والے میجر حسنین شہزاد ہمایوں اور کیپٹن عبدالصمد کی نماز جنازہ چکلالہ گیریژن راولپنڈی میں ادا کر دی گئی۔

آئی ایس پی آر کے مطابق وزیراعظم شہباز شریف اور فیلڈ مارشل سید عاصم منیر نے شہید افسران کی نماز جنازہ میں شرکت کی، نائب وزیراعظم، وزیر اطلاعات اور اعلیٰ سول و عسکری حکام بھی نماز جنازہ میں شریک ہوئے۔

پاک فوج کے شعبہ تعلقات عامہ کے مطابق پاک فوج کے دونوں افسران 12 اکتوبر کو کوئٹہ کے علاقے نواں کلی کے قریب مشاق تربیتی طیارے کے حادثے میں شہید ہوئے تھے۔

ترجمان پاک فوج کا کہنا ہے کہ پاکستان کی مسلح افواج اور پوری قوم شہید افسران کو خراج عقیدت پیش کرتی ہے، شہید افسران کی قربانی، جرات اور مادر وطن سے غیر متزلزل وابستگی قوم کے لیے باعث فخر ہے۔

آئی ایس پی آر کے مطابق دونوں شہید افسران کو ان کے آبائی علاقوں میں مکمل فوجی اعزاز کے ساتھ سپرد خاک کیا جائے گا۔