اسلام آباد(نیشنل ٹائمز) خیبرپختونخوا کی صورتحال پر ایوان صدر میں صدر مملکت آصف علی زرداری کی صدارت میں اہم اجلاس ہوا۔

ذرائع کا کہنا ہے کہ اجلاس میں وزیراعظم، اہم وفاقی وزراء اور سکیورٹی حکام نے شرکت کی جبکہ پیپلز پارٹی کے رہنما نوید قمر اور شیری رحمان بھی ایوان صدر میں موجود تھے۔

ذرائع کے مطابق اجلاس میں قومی سلامتی کے اداروں کی رپورٹس کا بھی جائزہ لیا گیا جبکہ ضم شدہ اضلاع سمیت خیبرپختونخوا کے 12 اضلاع میں ایمرجنسی کے نفاذ کی تجویز پر بھی غور کیا گیا۔

ذرائع کے مطابق خیبرپختونخوا میں عوام کے تحفظ کے لیے وفاق کے اہم اختیارات استعمال کرنے کی تجویز پر غور کیا گیا جبکہ آئین کے آرٹیکل 232 سے 234 کے تحت مختلف آپشنز پر بھی تبادلہ خیال کیا گیا۔

ذرائع کا بتانا ہے کہ اجلاس میں خیبرپختونخوا سے متعلق اہم فیصلوں کئے گئے ہیں۔

اجلاس کے بعد وزیراعظم شہباز شریف ایوان صدر سے واپس وزیراعظم ہاؤس چلے گئے، شہباز شریف نے وفاقی کابینہ کا ہنگامی اجلاس کل طلب کر لیا۔