واشنگٹن (شِنہوا) چینی صدر شی جن پھنگ اور امریکی صدر ڈونلڈ ٹرمپ نے اس بات پر اتفاق کیا ہے کہ باہمی احترام، انصاف اور دوطرفہ مفاد پر مبنی سٹریٹجک استحکام کے حامل تعمیری تعلقات استوار کئے جائیں۔
یہ اتفاق رائے وائٹ ہاؤس میں ہونے والی چائے کی نشست کے دوران ہوا جس میں شی جن پھنگ اور ان کی اہلیہ پھنگ لی یوآن جبکہ ٹرمپ اور ان کی اہلیہ میلانیا ٹرمپ شریک تھے۔
شی جن پھنگ نے کہا کہ واشنگٹن کا یہ دورہ 11 سال بعد امریکہ کا ان کا پہلا سرکاری دورہ ہے۔
شی نے کہا کہ اس دورے کے دوران دونوں فریقوں نے چین اور امریکہ کے تعلقات کے تصور میں نئی جہتیں شامل کیں اور باہمی احترام، انصاف اور دوطرفہ مفاد کی بنیاد پر سٹریٹجک استحکام کے حامل تعمیری تعلقات مشترکہ طور پر استوار کرنے پر اتفاق کیا۔
چینی صدر نے مزید کہا کہ دونوں ممالک نے اقتصادی اور تجارتی شعبوں میں باہمی مفاد پر مبنی نتائج بھی حاصل کئے ہیں جن کا دونوں ملکوں کے عوام اور عالمی برادری خیرمقدم کریں گے۔
چین امریکہ تعلقات کے روشن مستقبل پر زور دیتے ہوئے شی نے کہا کہ یہ تاریخ کے رجحان کی عکاسی کرتا ہے۔
شی نے کہا کہ وہ ٹرمپ کے ساتھ مل کر تاریخ کے حوالے سے حوصلے اور ذمہ داری کے احساس کے ساتھ چین امریکہ تعلقات کی تاریخ میں ایک نیا باب رقم کرنے کے لئے تیار ہیں۔
ٹرمپ نے شی کے سرکاری دورہ امریکہ کو تعمیری اور انتہائی کامیاب قرار دیتے ہوئے کہا کہ دونوں فریقوں نے چین امریکہ تعلقات اور اہم بین الاقوامی و علاقائی امور پر تفصیلی تبادلہ خیال کیا اور ایسے مثبت نتائج حاصل کئے جو دونوں ممالک کے لئے فائدہ مند ہوں گے۔
ٹرمپ نے کہا کہ وہ شی کے ساتھ قریبی رابطہ برقرار رکھنے اور چین امریکہ تعلقات کی ترقی کی مشترکہ رہنمائی کے منتظر ہیں۔