کین تھو، ویتنام (شِنہوا) چین کی پھنگ لو نہر سے گزرنے والے پہلے غیر ملکی تجارتی جہاز کے اعزاز میں جمعرات کو ویتنام کی کین تھو بندرگاہ پر استقبالیہ تقریب منعقد ہوئی۔
کنٹینر بردار جہاز 16 ستمبر کو چین کے جنوبی گوانگ شی ژوانگ خودمختار خطے میں واقع نان ننگ بندرگاہ سے روانہ ہوا تھا، جو پھنگ لو نہر سے گزرتا ہوا بدھ کو کین تھو بندرگاہ پہنچا۔
جہاز پر 252 بیس فٹ مساوی یونٹس (ٹی ای یوز) سامان لدا ہوا تھا، جس میں لکڑی کے پینل، سوڈیم سلفیٹ اور گاڑیوں کے پرزہ جات شامل تھے۔ یہ سامان زیادہ تر چین کے مغربی علاقوں سے لایا گیا تھا۔
بے بو خلیج پورٹ گروپ کے چیئرمین ہو ہوا پھنگ نے کہا کہ گروپ کین تھو بندرگاہ اور دیگر شراکت داروں کے ساتھ مل کر دو طرفہ کارگو کی ترسیل کو فروغ دینے، خدمات کو بہتر بنانے اور لاجسٹکس رابطوں کو مضبوط بنانے کے لئے کام کرے گا۔
134.2 کلومیٹر طویل یہ نہر گوانگ شی کے ہینگ ژو سے بے بو خلیج تک پھیلی ہوئی ہے اور 16 ستمبر کو اسے کھول دیا گیا تھا۔ یہ چین کے بیشتر جنوب مغربی علاقوں کے لئے سمندر تک رسائی کا قریب ترین بحری راستہ ہے۔
5 ہزار ٹن تک وزن والے جہازوں کے لئے بنائی گئی اس نہر کے ذریعے چین کے جنوب مغربی علاقوں سے سمندر تک سامان پہنچانے کے لئے اندرون ملک آبی راستے کا سفر روایتی راستوں، جو صوبہ گوانگ ڈونگ کی بندرگاہوں سے گزرتے ہیں، کے مقابلے میں 560 کلومیٹر سے زیادہ کم ہو جاتا ہے۔