نیویارک(نیشنل ٹائمز) وزیراعظم شہباز شریف نے یورپی کونسل اور یورپی کمیشن کے صدور کو پاکستان کے دورے کی دعوت دی ہے۔
وزیراعظم شہباز شریف سے صدر یورپی کونسل اور صدر یورپی کمیشن کی ملاقات ہوئی جس میں پاکستان اور یورپی یونین کے تعلقات کے تمام پہلوؤں کا جائزہ لیا گیا، دوران ملاقات پاکستان اور یورپی یونین کے درمیان اعلیٰ سطح پر بڑھتے باہمی روابط پر اظہار اطمینان کیا گیا۔
وزیراعظم نے یورپی یونین کے ساتھ وسیع البنیاد شراکت داری مزید مستحکم کرنے، اور مذاکرات، سفارت کاری، بین الاقوامی قانون اور تنازعات کے پر امن حل کی اہمیت کا اعادہ کیا۔
انہوں نے پاکستان یورپی یونین اسٹریٹجک انگیجمنٹ پلان پر مکمل عملدرآمد کے عزم کا بھی اظہار کیا۔
شہباز شریف کا کہنا تھا کہ اعلیٰ سطح پر مسلسل روابط باہمی تعلقات کو مزید وسعت دینے میں اہم کردار ادا کرتے ہیں، پاکستان باہمی مفاد پر مبنی شراکت داری کو مزید مستحکم کرنے کا خواہاں ہے۔
وزیراعظم نے یورپی یونین کے ساتھ تجارت کے فروغ کیلئے جی ایس پی پلس کی اہمیت کو اجاگر کرتے ہوئے جی ایس پی پلس فریم ورک کے تحت مسلسل روابط جاری رکھنے کے پاکستان کے عزم کا بھی اظہار کیا۔
