بیجنگ (شِنہوا) چینی وزیر دفاع ڈونگ جون نے بدھ کے روز کہا ہے کہ چینی فوج پیپلز لبریشن آرمی (پی ایل اے) کی 100ویں سالگرہ کے موقع پر فوجی تعمیر کا تجربہ بانٹنے کو تیار ہے۔
ڈونگ نے 13ویں بیجنگ شیانگ شان فورم کی افتتاحی تقریب سے خطاب کرتے ہوئے کہا کہ چینی فوج اپنی 100ویں سالگرہ منانے کے قریب ہے اور ہم اپنی جدت کے عمل کو تیز کر رہے ہیں۔ ہم تمام فریقوں کے ساتھ مسلح افواج کی تعمیر اور انتظام کے حوالے سے اپنے تجربات اور نظریات شیئر کرنے کو تیار ہیں۔
ڈونگ نے مزید کہا کہ چینی فوج ضرورت مند ممالک کو اپنی استطاعت کے مطابق امداد فراہم کرنے کے لئے بھی تیار ہے۔
پیپلز لبریشن آرمی (پی ایل اے) کا قیام یکم اگست 1927 کو نان چھانگ بغاوت کے دوران عمل میں آیا تھا جسے کمیونسٹ پارٹی آف چائنہ کی جانب سے انقلابی جنگ کی آزادانہ قیادت کے آغاز کی علامت سمجھا جاتا ہے۔
ڈونگ نے کہا کہ چینی فوج تمام فریقوں کے ساتھ مل کر مزید ٹھوس نتائج حاصل کرنے، عملی تعاون کے ذریعے باہمی کامیابی اور باہمی مفاد پر مبنی مستقبل کے قیام کے لئے بھی تیار ہے۔
انہوں نے کہا کہ اچانک رونما ہونے والی اور بار بار آنے والی قدرتی آفات کے پیش نظر چینی فوج اپنی پوری کوشش کرے گی اور جہاں ضرورت ہو مدد کرے گی۔
ڈونگ نے کہا کہ ہم مشترکہ طور پر آفات سے نمٹنے کے لئے ابتدائی انتباہ، ہنگامی ردعمل، انسانی ہمدردی کی بنیاد پر امداد اور عوامی تحفظ کے شعبوں میں تعاون کو فعال طور پر فروغ دیں گے اور عملی اقدامات کے ذریعے تمام ممالک کی ترقی اور سلامتی میں معاونت کریں گے۔