اسلام آباد(نیشنل ٹائمز)وزیر خارجہ شاہ محمود قریشی نے کہا ہے کہ پی ڈی ایم کے جلوسوں سے حکومت کو کوئی تشویش نہیں تاہم یہ جلسے کورونا کے پھیلاؤ کا ضرورسبب بنیں گے۔شاہ محمود قریشی نے اپنے ایک بیان میں کہا کہ اپوزیشن کی بے وقت کی راگنی الاپنے سے کوئی فرق نہیں پڑتا، گزشتہ تین سالوں سے پی ڈی ایم کی تمام تحریکیں ناکام ہوئی ہیں، پی ڈی ایم عملاً ختم ہو چکی ہے۔شاہ محمود قریشی کا کہنا تھا کہ پی ڈی ایم اب اپنی کوئی نئی چال چلنا چاہتی ہے تو اپنا شوق پورا کرے۔ وزیر خارجہ نے کہا کہ عمران خان کی قیادت میں ملکی ترقی کا سفر جاری ہے جو اپوزیشن کے شور شرابے سے رک نہیں سکتا، عمران خان کے پاس ملکی ترقی کا بھرپور ایجنڈا ہے جس پر صحیح معنوں میں عمل ہوا تو آئندہ اقتدار بھی پی ٹی آئی کا ہوگا۔