نئی دہلی (شِنہوا) چینی صدر شی جن پھنگ نے مصنوعی ذہانت، تجارت و سرمایہ کاری میں سہولت کاری، ڈیجیٹل انڈسٹری، سمارٹ مینوفیکچرنگ اور صلاحیتوں میں اضافہ کے شعبوں میں “وسیع تر برکس” تعاون کے لیے پانچ تجاویز پیش کی ہیں۔
شی نے یہ تجاویز اتوار کے روز نئی دہلی میں برکس کے سربراہی اجلاس کے دوران دوسرے روز پیش کیں۔
شی نے زور دیا کہ “وسیع تر برکس” کو زیادہ مئوثر کردار ادا کرنے، شاندار ترقی کی منزلیں طے کرنے اور عملی تعاون کے لیے ایک مضبوط بنیاد استوار کرنے کی ضرورت ہے۔
شی نے کہا کہ “وسیع تر برکس” کو چاہیے کہ وہ ابھرتی منڈیوں میں اپنی موجودگی اور گلوبل ساؤتھ کے ساتھ روابط کی طاقت کو بروئے کار لاتے ہوئے باہمی مفاد اور مشترکہ کامیابی کے لیے کھلے پن اور تعاون کا علمبردار بنے، صنعتی اور رسد کے نظام کو مستحکم اور بلاتعطل رکھے اور مربوط منڈیوں کو فروغ دے۔
انہوں نے اس بات کی بھی نشاندہی کی کہ “وسیع تر برکس” کو جدت طرازی کے مراکز تعمیر کرنے چاہئیں، روایتی صنعتوں کو جدید خطوط پر استوار کرنے کے ساتھ ساتھ ابھرتی صنعتوں کو پروان چڑھانا اور مستقبل کی صنعتوں کے لیے دور رس منصوبے بنانے چاہئیں تاکہ ابھرتی ہوئی ٹیکنالوجیز مشترکہ خوشحالی کی راہ روشن کر سکیں۔