اسلام آباد (نیشنل ٹائمز)وفاقی وزیر خزانہ و محصولات سینیٹر محمد اورنگزیب سے چیئرمین قومی احتساب بیورو (نیب) لیفٹیننٹ جنرل (ر) نذیر احمد نے وزارت خزانہ میں ملاقات کی۔ چیئرمین نیب نے وزیر خزانہ کو حکومت کے احتسابی ادارے کی جانب سے کئے جانے والے اہم اقدامات سے آگاہ کیا۔ انہوں نے مختلف معاملات کی جامع تحقیقات کے نتیجے میں رقوم کی وصولی کے ذریعے قومی خزانے میں ہونے والے مالیاتی اضافے اور نیب کی مجموعی کاوشوں پر بھی بریفنگ دی۔ وزیر خزانہ نے نیب کی جانب سے کی جانے والی موثر اور قابل تحسین کاوشوں کو سراہا اور قومی اہداف کے حصول کے لیے وزارت خزانہ کی جانب سے بھرپور تعاون کی یقین دہانی کرائی۔علاوہ ازیں علاوہ ازیں وزیر خزانہ سے ایشیائی ترقیاتی بینک (اے ڈی بی) کے جنوبی، وسطی و مغربی ایشیا کے نائب صدر ینگ منگ یانگ نے وفد کے ہمراہ ملاقات کی ۔ینگ منگ یانگ نے پاکستان میں معاشی استحکام کی جانب پیش رفت پر وزیر خزانہ اور حکومت کو مبارکباد دی اور مالیاتی نظم و نسق، بیرونی کھاتے اور مجموعی معاشی استحکام میں حاصل ہونے والی بہتری کو سراہا۔ انہوں نے پاکستان کی خودمختار کریڈٹ ریٹنگ میں مثبت پیش رفت کی بھی تعریف کرتے ہوئے اسے مسلسل اصلاحات اور معاشی بنیادوں میں بہتری کا ثبوت قرار دیا۔