بیجنگ (شِنہوا)چین نے رواں سال اپنے 5 جی نیٹ ورک کو وسعت دینے کا سلسلہ جاری رکھا اور جولائی کے اختتام تک 5 جی موبائل فون صارفین کی تعداد 1 ارب 30 کروڑ تک پہنچ گئی جو ملک کے مجموعی موبائل فون صارفین کا 70.5 فیصد ہے۔
وزارت صنعت و انفارمیشن ٹیکنالوجی کے جمعہ کے روز جاری کردہ اعداد و شمار سے ظاہر ہوتا ہے کہ ملک کے تین بڑے ٹیلی کام آپریٹرز اور ’چائنہ براڈنیٹ‘ کے مجموعی موبائل فون صارفین کی تعداد جولائی کے اختتام تک 1 ارب 85 کروڑ ہو چکی تھی۔
رواں سال کے پہلے سات مہینوں میں جدید طرز کے بنیادی ڈھانچے کی تعمیر میں مسلسل پیش رفت ہوئی ہے۔ جولائی کے اختتام تک 5 جی بیس اسٹیشنز کی تعداد 51 لاکھ 50 ہزار تک پہنچ گئی جس میں گزشتہ سال کے اختتام کے مقابلے میں 3 لاکھ 16 ہزار اسٹیشنز کا خالص اضافہ ہوا ہے۔
اس مدت کے دوران موبائل انٹرنیٹ ٹریفک میں تیزی سے اضافہ ریکارڈ کیا گیا جو گزشتہ سال کی نسبت 17.6 فیصد کے اضافے کے ساتھ 258 ارب 70 کروڑ گیگا بائٹس تک پہنچ گئی۔
جولائی کے اختتام تک تینوں بڑے ٹیلی کام آپریٹرز کے موبائل انٹرنیٹ آف تھنگز ٹرمینل صارفین کی مجموعی تعداد 2 ارب 99 کروڑ ہو گئی جس میں گزشتہ سال کے اختتام کے مقابلے میں 10 کروڑ 50 لاکھ صارفین کا اضافہ ہوا۔
فکسڈ براڈ بینڈ صارفین کی گیگا بٹ سروسز کی جانب منتقل ہونے کی رفتار برقرار رہی۔ جولائی کے اختتام تک تینوں بڑے ٹیلی کام آپریٹرز کے فکسڈ براڈ بینڈ صارفین کی تعداد 70 کروڑ 20 لاکھ تھی۔ اس مجموعی تعداد میں سے 26 کروڑ گیگا بٹ براڈ بینڈ صارفین تھے جو 37.1 فیصد بنتے ہیں، یہ گزشتہ سال کے اختتام کے مقابلے میں 2.6 فیصد پوائنٹس اضافہ ہے۔
چین نے دنیا کا سب سے بڑا معلوماتی بنیادی ڈھانچہ قائم کر لیا ہے۔ گیگا بٹ آپٹیکل نیٹ ورک کی رسائی ہر کاؤنٹی میں دستیاب ہے جبکہ 5 جی نیٹ ورک تمام قصبوں اور 95 فیصد سے زائد انتظامی دیہات تک قابل رسائی ہے۔
چین کے 15 ویں پانچ سالہ منصوبے (2026-2030) کے مطابق چین اپنے ’ڈیجیٹل چائنہ‘ اقدام پر تیزی سے عمل پیرا ہے جس کا مقصد 2030 تک ڈیجیٹل معیشت کی بنیادی صنعتوں کی ایڈڈ ویلیو کو جی ڈی پی کے 12.5 فیصد تک بڑھانا ہے۔