لاہور(نیشنل ٹائمز)جہلم کے قریب کالا گجراں ریلوے سٹیشن پر راولپنڈی سے لاہور آنے والی مسافر ٹرین راول ایکسپریس پٹری سے اتر گئی، تاہم حادثے میں کوئی جانی نقصان نہیں ہوا۔ریلوے ذرائع کے مطابق راول ایکسپریس رات ساڑھے 12 بجے راولپنڈی سے لاہور کے لیے روانہ ہوئی تھی، ٹرین جب جہلم کے قریب کالا گجراں سٹیشن پہنچی تو بریک فیل ہونے کے باعث حادثے کا شکار ہوگئی۔ریلوے حکام کے مطابق حادثے کے نتیجے میں ٹرین کا انجن اور 3 بوگیاں متاثر ہوئی ہیں، تاہم مسافروں میں سے کسی کے زخمی یا جاں بحق ہونے کی اطلاع نہیں ملی۔
ریلوے ذرائع کا کہنا ہے کہ حادثے کے بعد متعلقہ عملے نے صورتحال کا جائزہ لینا شروع کردیا، جبکہ متاثرہ ٹرین کی بحالی اور ریل ٹریک کو معمول کے مطابق کھولنے کے لیے اقدامات کیے جارہے ہیں۔حادثے کے باعث ٹرین سروس کے معمول کے شیڈول کے متاثر ہونے کا امکان ہے ، تاہم ریلوے حکام کی جانب سے مزید تفصیلات سامنے نہیں لائی گئیں۔ ادھر کراچی سے آنے والی یوسف والا کول ٹرین فیروزہ ریلوے سٹیشن کے قریب حادثے کا شکار ہوگئی۔ کوئلے سے بھری ٹرین بریک نہ لگنے کے باعث سینڈ ہمپ میں گھس گئی، جس کے نتیجے میں کول ٹرین کا انجن الٹ گیا۔ انجن کے ساتھ 10 ویگنیں بھی پٹری سے اتر گئیں، جبکہ حادثے کے باعث اپ ٹریک بلاک ہوگیا اور ٹرینوں کی آمدورفت معطل ہوگئی۔ حادثے میں کسی جانی نقصان کی اطلاع نہیں ملی۔
