بونیر(نیشنل ٹائمز)وزیراعلیٰ خیبرپختونخوا سہیل آفریدی نے دوٹوک الفاظ میں کہا ہے کہ لانگ مارچ 27 ستمبر کو ہی ہو گا تاریخ میں کوئی ردوبدل نہیں۔ میڈیا  سے گفتگو کرتے ہوئے وزیراعلیٰ نے کہا کہ سپریم کورٹ کے فیصلے کے باوجود بانی پی ٹی آئی عمران خان کا شفاانٹرنیشنل ہسپتال میں علاج نہیں کرایا گیا، لانگ مارچ کی قیادت میں خود کروں گا اور لاکھوں افراد اسلام آباد لے کر جا رہا ہوں۔سہیل آفریدی نے ہدایت کی کہ کارکن تیاری شروع کریں27 ستمبر کو کامیاب ہو کر واپس آئیں گے ۔اس سے قبل ہنگو میں ابوبکر صدیق چوک پر سٹریٹ موومنٹ کے شرکا سے خطاب میں سہیل آفریدی نے کہا کہ عمران خان سے متعلق عدالتی فیصلے کو حکومت نے ردی کی ٹوکری میں ڈال دیا، ایک مرتبہ پھر کچھ لوگوں نے ثابت کیا کہ وہ آئین و قانون سے بالاتر ہیں۔انہوں نے کہا کہ ہمارے خلاف کوئی ادارہ حکم دیتا ہے تو ایک گھنٹے میں عملدرآمد ہوجاتا ہے مگر خود کو بالاتر سمجھنے والوں نے عمل نہیں کیا ۔سہیل آفریدی نے کہا کہ طاقتوروں کو سزائیں نہیں دی جاسکتیں تو کمزور قیدیوں کو بھی آزاد کردیا جائے ، یہ نہیں ہوسکتا کہ ایک ملک میں کمزور کیلئے الگ اور طاقتور کیلئے الگ قانون ہو ،عمران خان کی جدوجہد کا مقصد کمزور اور طاقتور کیلئے ایک قانون ہے ، سوچنا ہوگا ملک کو کس طرف لے جارہے ہیں، کسان اور صنعتکار پریشان ہیں۔