پیرس (شِنہوا) بین الاقوامی توانائی ایجنسی (آئی ای اے) نے آبنائے ہرمز کی مسلسل بندش اور ایندھن کی بلند قیمتوں کی وجہ سے 2026 میں تیل کی عالمی طلب کے حوالے سے اپنے تخمینے میں کمی کر دی ہے جو کھپت پر اثر انداز ہو رہی ہیں۔
آئی ای اے نے اگست کے لئے اپنی آئل مارکیٹ رپورٹ میں پیش گوئی کی ہے کہ 2026 میں تیل کی عالمی طلب میں 16 لاکھ بیرل یومیہ کی کمی واقع ہوگی جو اس کے جولائی کے تخمینے سے 5 لاکھ 10 ہزار بیرل یومیہ زیادہ ہے۔
جولائی میں تیل کی عالمی رسد 24 لاکھ بیرل یومیہ بڑھ کر 10 کروڑ 15 لاکھ بیرل یومیہ ہو گئی تاہم یہ پھر بھی ایک سال پہلے کی سطح سے 63 لاکھ بیرل یومیہ کم تھی۔ جولائی اور اگست کے اوائل میں دوبارہ کشیدگی اور سمندری نقل و حمل میں رکاوٹوں نے رسد کی بحالی کی کوششوں کو نقصان پہنچایا جس کے باعث آئی ای اے نے اپنی پچھلی رپورٹ کے مقابلے میں تیسری سہ ماہی کے لئے تیل کی رسد کے تخمینے میں 17 لاکھ بیرل یومیہ کی کمی کر دی۔
جولائی میں خلیجی ممالک کے تیل کی پیداوار 25 لاکھ بیرل یومیہ بڑھ کر 2 کروڑ 39 لاکھ بیرل یومیہ ہو گئی جو جون میں 37 لاکھ بیرل یومیہ کے اضافے کے بعد ہوئی تھی لیکن یہ پھر بھی جنگ سے پہلے کی سطح سے 83 لاکھ بیرل یومیہ کم رہی۔ آبنائے ہرمز دوبارہ کھولنے اور باب المندب کی آبنائے سے بلا رکاوٹ نقل و حمل ممکن بنانے کے لئے معاہدہ طے نہ پانے کی وجہ سے آئی ای اے نے سال کے باقی مہینوں کے لئے اپنی رسد کا تخمینہ مزید کم کر دیا ہے۔ رپورٹ کے مطابق اب 2026 میں عالمی سطح پر تیل کی رسد 43 لاکھ بیرل یومیہ کم ہو کر 10 کروڑ 20 لاکھ بیرل یومیہ رہ جانے کی توقع ہے۔