ہانگ کانگ (شِنہوا) ہانگ کانگ خصوصی انتظامی خطے (ایچ کے ایس اے آر) کے چیف ایگزیکٹو جان لی نے جمعہ کو آسیان کے سیکرٹری جنرل کاؤ کم ہورن سے ملاقات کی، جس میں ہانگ کانگ اور آسیان کے رکن ممالک کے درمیان تعاون کو مزید فروغ دینے پر تبادلہ خیال کیا گیا۔
ملاقات کے دوران لی نے کہا کہ ہانگ کانگ خصوصی انتظامی خطے کی حکومت اپنے پہلے 5 سالہ منصوبے کی تیاری پر کام کر رہی ہے۔ انہوں نے مزید کہا کہ ہانگ کانگ تجارت، سرمایہ کاری، مالیات اور لاجسٹکس سمیت مختلف شعبوں میں آسیان کے رکن ممالک کے ساتھ تبادلوں اور تعاون کو مزید وسعت دیتا رہے گا تاکہ مشترکہ طور پر علاقائی اقتصادی ترقی کو فروغ دیا جا سکے اور باہمی فائدے اور سب کے لئے سودمند نتائج حاصل کئے جا سکیں۔
بیلٹ اینڈ روڈ انیشی ایٹو کے لئے ہانگ کانگ کے کارآمد اور متحرک کردار کو اجاگر کرتے ہوئے لی نے کہا کہ یہ شہر ایک “سپر کنیکٹر” اور “سپر ویلیو ایڈر” کے طور پر اپنا کردار ادا کرتا رہے گا، جبکہ “اندر لانے اور عالمی سطح پر لے جانے” کی اپنی صلاحیت سے فائدہ اٹھاتے ہوئے آسیان کے کاروباری اداروں کو اعلیٰ معیار کا کاروباری ماحول اور متنوع پیشہ ورانہ خدمات فراہم کرے گا۔
لی نے مزید کہا کہ ہانگ کانگ آسیان سیکریٹریٹ کے ساتھ قریبی روابط برقرار رکھے گا اور علاقائی جامع اقتصادی شراکت داری میں ہانگ کانگ کی جلد شمولیت کے لیے دیگر متعلقہ فریقوں کی حمایت بھی حاصل کرے گا۔