بیجنگ (شِنہوا) چین کے شہری ہوابازی کے ضابطہ کار ادارے نے 2026 سے 2030 کے عرصے کے لئے شہری ہوابازی کی صنعت کی ترقی کا 5 سالہ منصوبہ جاری کر دیا۔
چین کی شہری ہوابازی انتظامیہ (سی اے اے سی) کی جانب سےجمعہ کو جاری ہونے والے اس منصوبے کے مطابق صنعت کا ہدف ہے کہ 2030 تک حفاظت، خدمات کی استعداد اور بنیادی ڈھانچے کے شعبوں میں عالمی معیار حاصل کیا جائے، جبکہ تکنیکی اختراع، ماحول دوست اور کم کاربن ترقی اور انتظامی صلاحیت میں نمایاں پیش رفت بھی یقینی بنائی جائے۔
منصوبے کے مطابق اس مدت کے اختتام تک شہری ہوابازی کی صنعت قومی سطح کی اہم حکمت عملیوں کے نفاذ میں زیادہ موثر معاونت فراہم کرے گی، علاقائی اقتصادی و سماجی ترقی کو فروغ دے گی اور فضائی سفر کے حوالے سے عوام کی ضروریات کو مزید بہتر انداز میں پورا کرے گی۔
ان اہداف کے حصول کے لئے 2026 سے 2030 کے دوران صنعت حفاظت کو بنیادی ترجیح بناتے ہوئے سمارٹ، ماحول دوست اور مربوط ترقی کے راستے پر گامزن رہے گی۔
منصوبے میں بنیادی ڈھانچے کی بہتری اور خدمات کے معیار کو بلند کرنے کے لئے مربوط اقدامات پر زور دیا گیا ہے، جبکہ یہ بھی کہا گیا ہے کہ محفوظ، سہل، موثر، ماحول دوست اور کم لاگت پر مبنی جدید شہری ہوابازی کا نظام قائم کرنے میں فیصلہ کن پیش رفت حاصل کی جائے گی۔
سی اے اے سی کے تازہ ترین اعداد و شمار کے مطابق 2026 کی پہلی ششماہی میں چین کی شہری ہوابازی کی صنعت نے مستحکم ترقی کا سلسلہ برقرار رکھا، جبکہ مجموعی نقل و حمل کا حجم گزشتہ سال کی نسبت 6.4 فیصد اضافے کے ساتھ 83.37 ارب ٹن-کلومیٹر تک پہنچ گیا۔