چھنگ ڈاؤ (شِنہوا) چین نے جمعہ کے روز ساحلی ماحولیاتی نظام سے متعلق موقع پر کنٹرول شدہ تجربات کے لئے ایک بڑے سمندری تحقیقی پلیٹ فارم کو باضابطہ طور پر فعال کر دیا، جس کے ساتھ ملک میں ساحلی ماحولیات پر منظم، ذہین اور کھلے انداز کی تحقیق کے ایک نئے مرحلے کا آغاز ہو گیا۔
یہ سہولت چائنیز اکیڈمی آف سائنسز کے انسٹی ٹیوٹ آف اوشیانولوجی (آئی او سی اے ایس) نے تیار کی ہے اور اسے چین کے مشرقی صوبے شان ڈونگ کے شہر رونگ چھینگ کے قریب بحیرہ زرد میں نصب کیا گیا ہے۔ آئی او سی اے ایس نے بتایا کہ یہ قدرتی ساحلی ماحول میں تجربات کے لئے چین کی سب سے بڑی کھلی رسائی والی تحقیقی سہولت ہے۔
2 ہزار مربع میٹر کے کل رقبے اور 30 ہزار مربع میٹر کے تجرباتی سمندری زون کے ساتھ اس پلیٹ فارم کو حقیقی سمندری حالات میں ماحولیاتی مطالعے کی وسیع رینج کو سپورٹ کرنے کے لئے ڈیزائن کیا گیا ہے۔
آئی او سی اے ایس کی محقق اور اس پلیٹ فارم کو تیار کرنے والی ٹیم کی سربراہ سن شیاؤ شیا نے کہا کہ “یہ نیا پلیٹ فارم بنیادی طور پر ایک لیبارٹری ہے جسے سمندر پر منتقل کر دیا گیا ہے۔”
انہوں نے مزید کہا کہ “سمندری پانی کے حقیقی حالات میں ہم درجہ حرارت، غذائی اجزاء اور تحلیل شدہ آکسیجن جیسے اہم عوامل کو درست طریقے سے کنٹرول کر سکتے ہیں۔ یہ چیز ہمیں مسلسل اور مکمل سائیکل کا مشاہدہ کرنے کے قابل بناتی ہے اور اس نے قدرتی سمندری مشاہدے اور اندرون لیب کنٹرولڈ تجربات کے درمیان موجود تکنیکی رکاوٹ کو ختم کر دیا ہے۔”