نان ننگ (شِنہوا) چین کے جنوبی گوانگشی ژوانگ خود مختار علاقے میں موسلا دھار بارشوں کے کئی سلسلوں کے باعث آنے والے سیلاب سے 39 افراد ہلاک اور 9 لاپتہ ہو گئے۔
جمعرات کی دوپہر سیلاب سے بچاؤ اور آفات سے نمٹنے کے متعلق پریس کانفرنس میں بتایا گیا کہ ہلاکتوں میں علاقائی دارالحکومت نان ننگ میں ایک آبی ذخیرے کے بند میں شدید شگاف پڑنے کے نتیجے میں ہونے والی اموات بھی شامل ہیں۔
تاہم حکام نے واضح کیا کہ ہلاک اور لاپتہ ہونے والوں کی تعداد میں اضافہ ہو سکتا ہے کیونکہ کچھ متاثرین کی تکنیکی شناخت کا عمل ابھی جاری ہے۔
نان ننگ کے ڈپٹی میئر ڈنگ وی نے بتایا کہ مزید تصدیق کے بعد یہ معلوم ہوا ہے کہ نان ننگ کے ‘لیولان آبی ذخیرے’ کے ٹوٹنے سے 26 افراد ہلاک ہوئے ہیں، جن میں 5 نامعلوم افراد بھی شامل ہیں جبکہ 7 افراد کے لاپتہ ہونے کی اطلاع ہے۔
جمعرات کی صبح 11 بجے تک نان ننگ کی انتظامیہ نے مجموعی طور پر 64 ہزار 500 رہائشیوں کو نکال کر محفوظ مقامات پر منتقل کر دیا ہے۔ اس کے ساتھ ہی شہر کی انتظامیہ نے متاثرہ رہائشیوں کو ایک لاکھ ضروری اشیاء فراہم کی ہیں، جن میں کپڑے، پینے کا پانی، خوراک، ادویات اور پاور بینک شامل ہیں۔
ملبہ ہٹانے اور صفائی کے کاموں کے لئے 4 ہزار 200 سے زائد اہلکاروں کو متحرک کیا گیا ہے، جبکہ ماحول کی نگرانی اور جراثیم کشی کے لئے 300 سے زائد ماہرین کو روانہ کیا گیا ہے۔ پریس کانفرنس کے مطابق اب تک کسی بیماری کے پھیلنے یا پبلک ہیلتھ ایمرجنسی کی کوئی اطلاع موصول نہیں ہوئی ہے۔