اسلام آباد (نیشنل ٹائمز) پاکستان ٹیلی کمیونیکیشن اتھارٹی (پی ٹی اے) نے تصدیق کی ہے کہ ایس ایم ڈبلیو 5 (SMW-5) آبدوز انٹرنیٹ کیبل میں فنی خرابی کے باعث ملک کے مختلف حصوں میں انٹرنیٹ سروسز جزوی طور پر متاثر ہوئی ہیں، جس کے نتیجے میں بعض صارفین کو انٹرنیٹ کی رفتار میں کمی اور کنیکٹیویٹی کے وقفے وقفے سے مسائل کا سامنا ہے۔

پی ٹی اے کے مطابق خرابی کی نوعیت اور اس کی اصل وجہ کا تعین کرنے کے لیے ٹی ڈبلیو اے (TWA) اور ایس ایم ڈبلیو 5 کنسورشیم مشترکہ طور پر کام کر رہے ہیں۔ اتھارٹی کا کہنا ہے کہ صورتحال پر مسلسل نظر رکھی جا رہی ہے تاکہ خرابی کو جلد از جلد دور کیا جا سکے۔

پی ٹی اے نے بتایا کہ انٹرنیٹ سروس کے تسلسل کو برقرار رکھنے کے لیے بین الاقوامی انٹرنیٹ ٹریفک متبادل عالمی لنکس پر منتقل کر دی گئی ہے، جس سے صارفین کو درپیش مشکلات کو کم سے کم رکھنے کی کوشش کی جا رہی ہے۔

ترجمان پی ٹی اے کے مطابق معمول کی انٹرنیٹ سروس کی جلد بحالی کے لیے متعلقہ قومی اور بین الاقوامی اداروں سے مسلسل رابطہ برقرار ہے، جبکہ ایس ایم ڈبلیو 5 کیبل کی بحالی کے متوقع وقت سے متعلق معلومات موصول ہوتے ہی عوام کو آگاہ کر دیا جائے گا۔