لاہور(نیشنل ٹائمز)گورنرپنجاب سردار سلیم حیدر خان نے کہا ہے کہ اگلا الیکشن آزاد جموں و کشمیر میں ہے ، عوام کو پیشگی مبارکباد دیتا ہوں کہ وہاں پر بھی پیپلزپارٹی ہی جیتے گی، پیپلزپارٹی نے اپنے دور حکومت میں سرکاری ملازمین کی 50فیصد تنخواہیں بڑھائیں ۔وہ کمالیہ میں سابق ایم این اے بیلم حسنین کی جانب سے دیئے گئے استقبالیہ سے خطاب کررہے تھے ۔گورنر  پنجاب نے مزید کہا کہ پیپلزپارٹی جب بھی اقتدار میں آئی تو لوگوں کے لیے نوکریوں کے مواقع پیدا کئے ،ہم نے عوام کو سرکاری ملازمتیں مہیا کیں،اگر غریب کا درد کسی نے محسوس کیا تو وہ صرف پیپلزپارٹی ہی ہے ،پیپلزپارٹی نے مستحق خواتین کیلئے بے نظیر انکم سپورٹ پروگرام شروع کیا جس کی اب رقم انشائاللہ 20 ہزار ہو جائے گی ،جب تک ذوالفقار بھٹو کی نسل سے پیپلزپارٹی کی قیادت موجود ہے بے نظیر انکم سپورٹ پروگرام کبھی ختم نہیں ہو گا۔ سلیم حیدر نے کہا کہ مجھے بہت دُکھ ہے غریب آدمی کیلئے دو وقت کی روٹی کا بندوبست کرنا مشکل ہے ،سندھ میں مہنگے سے مہنگا علاج صرف 10 روپے کی پرچی پر ہوتا ہے ،پنجاب کی گلی گلی محلے محلے میں پیپلزپارٹی کا پیغام پہنچاؤں گا اور کامیاب کراؤ ں گا ، اگلے الیکشن میں عوامی مینڈیٹ سے بلاول بھٹو ملک کے وزیراعظم بنیں گے ۔