بیجنگ (شِنہوا) چین نے مخصوص اور منفرد کاروباری ماڈلز کے فروغ اور سٹارٹ اپس کو اپنی مارکیٹ میں موزوں جگہ تلاش کرنے میں مدد دینے کے لئے ایک عملی منصوبہ جاری کیا ہے۔
وزارت انسانی وسائل اور سماجی تحفظ سمیت 4 سرکاری محکموں کی طرف سے جاری ہونےوالے نوٹس کے مطابق 2028 تک مہارت پر مبنی انٹرپرینیورشپ کی مدد کرنے والے پالیسی نظام میں مستقل بہتری لائی جائے گی اور سٹارٹ اپ ایکو سسٹم کو مزید بہتر بنایا جائے گا۔ اس کا مقصد روزگار کے مزید مواقع پیدا کرنے کے لئے 4 ماڈلز کا بہتر استعمال کرنا ہے جن میں انٹرپرینیورشپ کو سائنسی و تکنیکی کامیابیوں، صنعتی ترقی، پیشہ ورانہ مہارتوں اور عوامی معیشت کی ضرورتوں کے ساتھ جوڑنا شامل ہے۔
ان اقدامات میں یونیورسٹیوں، تحقیقی اداروں اور عوامی اداروں کے محققین کو اپنی ملازمتوں سے رخصت لینے کی اجازت دے کر ٹیکنالوجی کمپنیاں شروع کرنے کی حمایت کرنا اور مارکیٹ کی طلب کے ساتھ تحقیقی نتائج کو ہم آہنگ کرنے کے لئے ایک باقاعدہ طریقہ کار قائم کرنا شامل ہے۔
صنعتی ترقی کے لئے اس منصوبے کا مقصد ہونہار چھوٹے اور درمیانے درجے کے کاروباروں کے لئے بہتر سپورٹ سسٹم بنانا ہے۔ یہ دیہی علاقوں میں سپلائی چین اور مقامی خصوصی صنعتوں کو فروغ دینے کی حوصلہ افزائی کرتا ہے اور کاروباری تجربہ رکھنے والے مہاجر مزدوروں پر زور دیتا ہے کہ وہ اپنے گھروں کو واپس لوٹیں، مقامی وسائل کا استعمال کریں اور وہاں نئے کاروبار شروع کریں۔
مختلف سطح پر تربیتی پروگرامز کے ذریعے کاروباری مہارتیں بڑھانے اور ہنر مند کاروباری افراد کی نئی نسل تیار کرنے کا بھی منصوبہ ہے، ساتھ ہی تسلیم شدہ لیبر برانڈز کے لئے معیاری تربیت فراہم کی جائے گی۔
منصوبہ بزرگوں اور بچوں کی دیکھ بھال سے متعلق مزید خدمات شروع کرنے کی تجویز بھی دیتا ہے۔ کاروباری افراد کو نگہداشت، نرسنگ اور گھریلو خدمات کی بڑھتی ہوئی طلب پوری کرنے اور کمیونٹی ورکشاپس، سہولت سٹورز اور تازہ خوراک کی منڈیوں کے قیام کی ترغیب دی جائے گی۔