پیانگ یانگ (شِنہوا)کمیونسٹ پارٹی آف چائنہ (سی پی سی) کی مرکزی کمیٹی کے جنرل سیکرٹری اور چینی صدر شی جن پھنگ پیر کو عوامی جمہوریہ کوریا (ڈی پی آر کے) کے سرکاری دورے پر پیانگ یانگ پہنچ گئے۔
ورکرز پارٹی آف کوریا کے جنرل سیکرٹری اور ڈی پی آر کے کے ریاستی امور کے صدر کم جونگ اُن اور ان کی اہلیہ ری سول جو نے ہوائی اڈے پر شی جن پھنگ اور ان کی اہلیہ پینگ لی یوآن کا استقبال کیا۔ طیارے کی سیڑھیاں اترنے کے بعد کم جونگ اُن نے شی جن پھنگ سے گرمجوش مصافحہ کیا۔
کم جونگ اُن نے پیانگ یانگ کے کم ال سونگ سکوائر میں شی جن پھنگ کے اعزاز میں شاندار استقبالیہ تقریب کا اہتمام کیا۔ دونوں جماعتوں اور دونوں ممالک کے اعلیٰ رہنما مشترکہ طور پر سلامی کے چبوترے پر آئے۔ 21 توپوں کی سلامی کے دوران فوجی بینڈ نے چین اور ڈی پی آر کے کے قومی ترانے بجائے۔
شی جن پھنگ نے کم جونگ اُن کے ہمراہ کورین پیپلز آرمی کی تینوں مسلح افواج کے اعزازی دستے کا معائنہ کیا۔ اس کے بعد شی جن پھنگ نے کم جونگ اُن کے ساتھ فوجی پریڈ کا مشاہدہ کیا۔
پیانگ یانگ کے مختلف شعبہ ہائے زندگی سے تعلق رکھنے والے جشن کے لباس میں ملبوس افراد، بچوں اور نوجوانوں نے جھنڈے، پھول اور غبارے اٹھائے ہوئے تھے جنہوں نے پرجوش تالیاں بجا کر اور نعرے لگا کر معزز چینی مہمانوں کا خیرمقدم کیا۔
ہوائی اڈے سے کم ال سونگ سکوائر اور کم ال سونگ سکوائر سے کمسوسان اسٹیٹ گیسٹ ہاؤس تک کے راستے میں ڈی پی آر کے کے عوام سڑکوں کے دونوں جانب کھڑے ہو کر شی جن پھنگ کی آمد کا خیرمقدم کرتے رہے۔
اپنی آمد سے قبل روڈونگ سین مون میں شائع ہونے والے ایک دستخط شدہ مضمون میں شی جن پھنگ نے کہا کہ وہ کم جونگ اُن سے ملاقات کے منتظر ہیں تاکہ دونوں ممالک کے درمیان روایتی دوستی پر بات چیت کی جا سکے اور دوطرفہ تعلقات کی مجموعی ترقی پر تبادلہ خیال کیا جا سکے۔