بیجنگ (شِنہوا)چین کی وزارت آبی وسائل نے اتوار کے روز صوبائی سطح کے 6 خطوں میں سیلاب کی چوتھے درجے کی ہنگامی صورتحال نافذ کر دی ہے۔
ہونان، گوانگ ڈونگ، گوانگشی، چھونگ چھنگ، سیچھوان اور گوئی ژو کے علاقوں میں اس ہنگامی صورت حال کو لاگو کیا گیا ہے۔
چین میں ہنگامی صورتحال سے نمٹنے کا 4 درجاتی نظام رائج ہے جس میں پہلا درجہ سب سے شدید ترین سطح کا انتباہ ہوتا ہے۔
اتوار سے منگل کے دوران ان 6 صوبائی سطح کے خطوں میں شدید بارشوں کا سلسلہ چلے گا جبکہ کچھ علاقوں میں انتہائی شدید طوفانی بارشوں کی بھی توقع ہے۔
ان خطوں میں بہنے والے متعدد دریاؤں میں پانی کی سطح بڑھنے کا امکان ہے اور طوفانی بارشوں سے متاثرہ علاقوں میں چھوٹے اور درمیانے درجے کے دریاؤں میں سیلاب کا خطرہ ہے جو خطرے کے نشان کو عبور کر سکتا ہے۔ اس کے علاوہ پہاڑی علاقے بھی پہاڑی ندی نالوں میں طغیانی کی زد میں آ سکتے ہیں۔
وزارت نے مقامی آبی حکام اور دریاؤں کے طاس کے انتظامی اداروں کو نوٹس جاری کر دیئے ہیں تاکہ سیلاب سے بچاؤ کے لئے ہدف پر مبنی انتظامات کئے جا سکیں۔