شنگھائی (شِنہوا) چینی سائنسدانوں نے مکئی میں پروٹین کی اعلیٰ مقدار پیدا کرنے والے 2 اہم جینز کی نشاندہی کر لی ہے اور وہ اعلیٰ پروٹین والی اقسام تیار کرنے میں کامیاب ہو گئے ہیں جو چین میں جانوروں کی خوراک کے لئے پروٹین کی کمی کا ایک امید افزا حل فراہم کرتی ہے۔
چائنیز اکیڈمی آف سائنسز (سی اے ایس) کے سنٹر فار ایکسیلینس ان مالیکیولر پلانٹ سائنسز (سی ای ایم پی ایس) کے ڈپٹی ڈائریکٹر وو یونگ روئی کے مطابق پیداواری حجم کے لحاظ سے مکئی چین کی سب سے بڑی اناج کی فصل ہے تاہم اس میں پروٹین کی مقدار عام طور پر صرف تقریباً 8 فیصد ہوتی ہے۔ یہی وجہ ہے کہ مویشیوں کے لئے پروٹین کے حصول کی خاطر چین کو درآمد شدہ سویا بین کے چارے پر بہت زیادہ انحصار کرنا پڑتا ہے۔
وو نے بتایا کہ 2025 میں چین کی سویا بین کی درآمدات 10 کروڑ ٹن سے تجاوز کر گئی تھیں۔ اگر مکئی میں پروٹین کی مقدار میں صرف ایک فیصد اضافہ کر دیا جائے تو یہ تقریباً 80 لاکھ ٹن درآمد شدہ سویا بین سے حاصل ہونے والے پروٹین کے برابر ہوگا۔
چارے میں درآمد شدہ سویا بین کے متبادل کے طور پر زیادہ پروٹین والی مکئی تیار کرنا ملک میں چارے کی پروٹین کی قلت کو دور کرنے کے لئے ایک بہترین حکمت عملی ہے۔ تاہم وو نے واضح کیا کہ ایک طویل عرصے سے افزائش نسل کی کوششوں کو اعلیٰ معیار کے پروٹین جینز تک رسائی حاصل نہیں تھی۔
وو نے مزید وضاحت کی کہ تحقیق سے معلوم ہوا ہے کہ جنگلی مکئی میں پروٹین کی سطح 30 فیصد تک زیادہ ہوتی ہے لیکن 9 ہزار سال سے زائد عرصے کی گھریلو کاشتکاری اور جدید افزائش نسل کے عمل کے دوران پروٹین کی مقدار کے لئے مخصوص انتخاب نہ ہونے کی وجہ سے جدید اقسام میں سے اکثر جینز “غائب” ہو گئے تھے۔